خطوات مابعد الخطوبة

جاء فارس الأحلام وتم المراد وحصلتِ الآن على لقب "مخطوبة"..بعد بحث طويل على مواقع الزواج
هناك عدة نصائح حاولي فعلها سريعا ولا تؤجليها..


1- اتصلي بجميع أقاربك:
مهمتك الأولى هي إبلاغ جميع الأقارب والمعارف حتى لو لم تكن صلتك بهم قوية، فقول هذا الخبر لن يكلفك شيئا، فقط ارفعي سماعة التليفون كي تشارك معكِ عائلتك وأصدقائك الخبر السعيد، ويمكنك إخبارهم أيضا عن طريق البريد الالكتروني أو المواقع الاجتماعية على شبكة الانترنت ويمكنك الاستعانة بوالدتك أو أحد أفراد عائلتك المقربين لمساعدتك في هذه المهمة.
2- اعرفي مقاس الشبكة:
الشبكة الذهبية أو خاتم الزواج هو حلم أي فتاة، ولكن ما يفسد جمالها هو مقاسها غير المضبوط على أصابعك، بأن يكون أكبر أو أصغر من حجم إصبعك، فيجب أن تعلمي مقاسك حتى تتمتعي بارتداء متميز.
3- حددي ميعاد للزفاف:
بعد تلقي التهاني ومشاهدة الشبكة والدبلة يبدأ الجميع بالسؤال عن موعد الزفاف، والرد على إجابة هذا السؤال بتحديد ميعاد منذ البداية سيجنبك الكثير من المعاناة في السؤال عن سبب عدم تحديد ميعاد للزفاف، فأغلب المحيطين بكم يعتبروا أنفسهم أوصياء عليكم ويبدؤوا في اقتراح مواعيد للزفاف، بالإضافة أن تحديد ميعاد مبدئي للزفاف سيجعلك مع خطيبك في وضع التخطيط للزواج بشكل جدي.
4- حلم العمر:
ابدئي الآن بجمع خطط الزفاف من خلال المجلات والمواقع المتخصصة، واستمعي لتجارب من سبقك إلي هذا الحدث، لتحصلي على أفضل تنظيم يناسبك في هذا اليوم الهام، وخصصي أجندة دوني بها كل النصائح والتفاصيل التي تودين تسجيلها بخصوص الاستعداد للزواج.
5- مع خطيبك:
لا تدعي الخطوبة والتحضير لزفافك وتفاصيل الزواج، تبعدك عن خطيبك، فهذا الوقت هام ليتعرف كل طرف بالطرف الأخر، فخصصي وقت تقضياه سوياً بدون التحدث عن أي تفاصيل تخص الزواج أو الخطوبة، فقط للتحدث عنكما وعن مشاعركما.
6- حددي ميزانية:
اعرفي بشكل تقديري الشكل العام لزفافك وتكلفته، وابدئي من الآن في الادخار لهذا اليوم، حتى لا تفاجئي عندما يحين موعد الزفاف بعدم حصولك على ما تريدين بسبب أن ميزانيتك لا تسمح بذلك، فاستعدي بالادخار من الآن.
7- تجنبي التوتر:
فترة الخطوبة ستمر بك مرة واحدة بالعمر، فابتعدي عن أي توتر يمكن أن يصيبك، فهدوء الأعصاب والاسترخاء هما ما سيجلبان لك السعادة، فعليك بتجنب أي توتر يصيبك أو يصيب خطيبك، حتى تنعما بفترة خطوبة سعيدة

اسئلة للمخطوبين فقط

نقترح على كل خطيبين باحثين عن حياة زوجية سعيدة ان يجيبا على هذه الاسئلة

1- ما هو طموحك المستقبلي وما هدفك في الحياة؟

إن لكل إنسان أمنية في حياته يسعى لتحقيقها سواءً في المجال الاجتماعي أو الديني أو الأسري أو العلمي وغيره ،ومن المهم في بداية التعارف بين الخاطب والمخطوبة أن تكون الرؤية المستقبلية للطرفين واضحة. وكلما كانت الرؤية واضحة كلما قل الخلاف بين الزوجين في المستقبل.

2-ما هو تصورك لمفهوم الزواج؟

إن هذا السؤال من الأسئلة المهمة بين الطرفين ،وذلك حتى يتعارف الطرفان على بعضهما أكثر، تقول إحدى المتزوجات: فوجئت عندما عرفت أن مفهوم الزواج عند زوجي هو مجرد تحقيق رغباته الجنسية فقط ، وأما أنا فلا احترام لي ولا تقدير وكل المسئوليات ملقاة علي . ويقول الزوج : كم فوجئت عندما علمت أن مفهوم الزواج عند زوجتي أنة من أجل الأبناء وأنا معها في مشاكل دائمة وإلي الآن لم يرزقنا الله الولد . فمعرفة مفهوم الزواج عند الطرفين والحوار حوله من الأمور التي تساعد على الاستقرار الأسري مستقبلاً.

3-ما هي الصفات التي تحب أن تراها في شريك حياتك؟

جميل أن يتحدث الإنسان عن مشاعره وما يحب وما يكره وأجمل من ذلك كله أن يكون مثل هذا الحوار قبل الزواج بين الخاطب والمخطوبة ، حتى يستطيع كل طرف أن يحكم على الطرف الآخر إذا كان يناسبه من عدمه. ونقصد بالمحبوبات والمكروهات إلى النفس من السلوك والاخلاقيات والأساليب والمطعومات والهوايات وغيرها .

4-هل ترى انه من الضروري إنجاب الطفل في أول سنة من الزواج؟

لعل البعض يعتقد أن هذا السؤال غير مهم ، ولكن كم من حالة تفكك وانفصال حصلت بين الأزواج بسبب هذا الموضوع وخصوصاً إذا بدأ أهل الزوج أو الزوجة يضغطون على الزوجين في موضوع الإنجاب ، ولكن على الزوجين ان يتفقا فيما بينهما على هذا الموضوع. وأن لا يكون سبباً من أسباب المشاكل الزوجية في المستقبل ، ونحن لم نققل أن الأفضل الإنجاب في أول سنة أو التأخير وإنما نترك هذه المسألة لاتفاق الخطيبين.

5-هل تعاني من اى تارخ مرضى فى العائلة؟

لا شك أن معرفة الأمراض التي يعاني منها الطرف الأخر لا قدر الله تؤثر في قرار الاختيار الزواجي بل إن إخفاء المرض على الطرف الأخر يعتبر من الغش في العقد فلا بد أن يكون ذلك واضحاً بين الطرفين سواًكان به عاهة مستديمة أو برص في أماكن خفية من جسدة أو مرض السكر أو غيرها من الأمراض أو العيوب التي يعاني منها المقبل على الزواج.

6-هل أنت اجتماعي؟ ومن هم أصدقاوك؟

إن العلاقات الاجتماعية هي أبرز ما يميز الإنسان ، ومهم أن يكون الإنسان اجتماعي الطبع يألف ويؤلف ، يحب ويحب ومهم عند التعارف أن يتعرف على الطرف الأخر من الناحية الاجتماعية كمعرفة أصدقائه وقوة علاقته بهم. وهل هو من النوع الاجتماعي أو الانطوائي.

7-كيف هي علاقتك بوالديك؟ (إخوانك ، أخواتك ، أرحامك).

إن معرفة علاقة الخاطب أو المخطوبة بوالديه وأهله أمر في غاية الأهمية وذلك لأنة كما يقال إن الزواج ليس عقداً بين طرفين فقط وإنما هو عقد بين عائلتين فالزوج لن يعيش مع زوجته بمفرده منقطعاً عن العالم من حوله ، وإنما سيعيشان معاً وكلما كانت العلاقة بالوالدين بالوالدين حسنة كلما بارك الله في هذا الزواج ، وكتب لهذه العائلة التوفيق.

8-بماذا تقضي وقت فراغك ؟ وما هي هواياتك.

كلما ازداد التعرف على الطرف الأخر كلما كان القرار بالاختيار سهلا و ميسراً ، وإن معرفة ما يحب الإنسان عملة في وقت فراغه دليل على شخصيته ومعيار لطموحه وأهدافه في الحياة ونظرته لمستقبله وشخصيته.

9-هل لك نشاط خيري أو تطوعي ؟

كلما كانت علاقة الشخص بربه قوية كلما كان مأمون الجانب ويفضل أن تكون الفتاة أو الفتى يقتطعا جزءاً من وقتهما للعمل الخيري التطوعي وذلك من خلال تقديم عمل انمائي أو مساعدة أو حضور مجالس الخير والاستفادة منها فإن هذا النشاط مما يجدد الحياة الزوجية ويقوي العلاقة بينهما لأنهما يسعيان في هذه الدنيا من أجل هدف واحد وهو مرضاة الرب.

10-ما رأيك لو تدخلت والدتي أو والدتك في حياتنا الشخصية؟

إن هذا السؤال ينبغي أن يطرحة المقبل على الخطوبة وذلك ليتعرف كل واحد منهما على الأخر في هذا الجانب ومدى حساسيته عنده فيتفقا إذا اختلفا في وجهة النظر على سياسة في التعامل بينهما وطريقه في حل الخلاف لو حصل تدخل من الوالد أو الوالدة أو حتى الجدة في علاقتهما الخاصة. ويمكن أن تراجع صفحة تجارب ناجحة لتستفيد مما ذكر فيها .

و فى شأن حدود الخطوبـة فانه و بكل صراحة وبدون حرج فان فترة الخطوبة ليست فترة اختبار انما فترة اعداد للزواج وتعميق لرباط المحبة ورعاية الحب الولي و كل ما يؤخذ خلسة ليس من حق الخطيبين فهو يوجع الضمير ويقلق البال فالخطوبة مرأة الحياة الزوجية ومن يخدش مراّته سيخدش حياته الزوجية فليتجمل كل خطيبين بالعقل و راعيا الله فى علاقتكما و لتكن تعبيراتكما كلاما جميلا بريئا معبرا عن الاحساس والرقة وصدق المعاملة

قواعد الخطوبة

آنستي العزيزة.. لو ربنا فك عقدتك.. واتخطبتي.. فإليك نصائح حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد..

أجمل ما في الخطوبة العزومات الرومانسية.. على أحلى محلات أكل ف البلد.. واللي عمرك مانتي شايفاها بعد الجواز.. المهم نصائحي لك عند أي عزومة مع ختيبك.." قلنا حبة رقَّة"



1- الأول لازم تعرفي إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوق طبعًااا

2- العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي.. العيش بيتقطع بالسكينة ف الطبق.. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي حِفِّي زي مانتِ عايزه…
.
3- الشوووربة.. أبوس كعب رجلك.. بند الشوربة ده مهم جدًاااا.. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ ف الحجر للزبون.. وطبعًاااااا عايزاكى تنسى تمامًا.. السلطانية اللي بتقيميها على بقك ف البيت.. وتدلدقي على روحك..بالمعلقه وبدون صوت.. سخنة ولعة برضه بدون صوت.. وتسيبي تلت الطبق ع الأقل.. مش تميليه.. عشان تلهطيها لآخر نقطة…..

4- الرز طبعاً .. بيتاكل بالشوكة.. أوعي إيدك تتمد ع المعلقة.. وتغرفي من طبق الرز وتعبي.. إوعي.. الرز بالشوكة.. وكأنك بتبوسيه مش بتاكليه..

5- المكرونة.. الاسباجتي.. برضه بالشوكة.. تتلف على طرف الشوكة.. لحد ما تخلص وبعدين تحطيها ف بؤك من سكات.. مش تشفطي المكرونة عود عود..

6- السمك.. مشكلة.. شوفي.. بتفصلي اللحم عن الشوك.. إزاي..؟؟ تقطعي اللحم من النص.. بالطول وبعدين تفردي اللحم ع الجنبين ولما تخلصي ناحية.. متقلبيش السمكة.. بلاش فلح.. شيلي السلسلة بالشوكة والسكينة وحطيها ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص.. قولي مابحبش السمك وخلصي نفسك..

7- الجمبري.. -إذا كنتي عارفاه-.. أول ماطبق الجمبري ينزل.. بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت بابااااا.. وأتنهدي جامد وقولي.. برضه..؟؟؟ وتروحي قاطعة راس الجمبريياية.. بالشوكة.. أنا ف عرضك إنسي المصمصة دلوقت..

8- البطاطس سواء مسلوقة أو محمرة.. أوعي تهرسيها وتدبيها ع الرز وتدي …لا..لآ…لآ…بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي..

9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي….

10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة.. أنا أودامي أسبوع.. هابطل أكل فيه….
.
وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك..
وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي.. وبالهنا والشفااااااااااااا وبالنسبة للهدايا مش هوصيكى لازم تكون رومانسيه وماتحاوليش تسترخصى علشان هيعرف

احنا بنتجوز ليه؟؟؟ حد عارف

الجواز ....الفكرة الاساسية و الكبيرة اللى قايمة عليها البشرية كلها منذ ادم حتى يومنا هذا ...فكرة مهمة و خطيرة...و اساسية بيقوم عليها كيان مجتمع و بلد...و لانه للاسف اتحول الايام ديه لعملية تجارية عند بعض الناس..او اداء واجب... اهوا المفروض نتجوز علشان كدة...بقى المهم الشقة ال50000 متر و الصالون و الصينى....وفرح و زيطة ...و مبقاش المهم السؤال اللى كل واحد بيتجوزممكن يسأله لنفسه..هوا انا بتجوز ليه؟؟؟؟؟؟؟؟؟؟؟؟؟!!!!!!!!!!!!!!



تلاقى الاتنين اللى قرروا انهم يتجوزوا بعض سواءا عن حب او صالونات او حتى انتريهات... او عن طريق البحث عن زوج او البحث عن زوجة من خلال مواقع الزواج تيجى تسألهم هوا انتوا بتتجوزوا ليه........فتلاقى بقى ايجابات....علشان دى سنة الحياه او علشان دى النهاية الطبيعية لحبنا....او علشان ده عريس كويس و امكانياته كويسة و حيعيشنى فى مستوى كويس...او علشان دى عروسة محترمة و متدينة و بنت ناس و حتعرف تربى العيال .....او علشان الاستقرار..او علشان الجواز هوه نص الدين...او علشان احمى نفسى من الفتن...

وبرده ايا كان الرد...كل واحد حر بس اللى انا عايزة اشير ليه و اللى انا محتاجة ان الناس تفكر فيه ...احنا ليه بنتجوز علشان نجيب عيال و يبقوا عبء.... ازاى حناكلهم و نشربهم و ازاى ندخلهم مدارس كويسة و نعلمهم و نلبسهم و بننسى نقول اهم حاجة .... ازاى نربيهم..؟؟؟؟؟؟؟؟؟...

او علشان بعد سنة من الجواز نلاقى سلسلة من النكد و الهم و المصاريف و يحس الراجل انه ادبس و الست انها اتسرعت.....ليه متبقاش الحياه جميلة و مستمرة و سعيدm بعد الجواز زى ما كانت قبله...الاسباب كتير....يمكن علشان التعود..او يمكن ان كل طرف ضمن ان التانى بقى فى ايده فما مش لازم يبذل جهد علشان يحافظ عليه...او او او..الاسباب كتيرة متعلقة بالاشخاص و الاسباب اللى قامت عليها الجوازة دى......بس اللى انا بشوفه فى فكرة الجواز دى .......ان الجواز عبارة عن.. جواز مرور لحياة.

انت طول عمرك عايش فى بيت اهلك هما اللى ربوك و صرفوا عليك و اتحكموا فى قراراتك و برده اثروا فى شخصيتك...و بييجى وقت..تقرر فيه انك تتجوز..تستقر زى منتا او انتى بتقولوا.....(مع انى مش فاهمة هى حياتك مضطربة ليه من غير جواز)؟!!! .
.....بس لو الاتنين اللى بيتجوزوا دول لوفكروا انهم بيسيبوا بيت اهلهم..و يروحوا يبنوا حياتهم هما... كيانهم هما بشخصيتهم و وعيهم و تقديرهم للاشياء..... كيان واحد بيقوم و يتبنى بعقل و تفكير اتنين بيحطوا كل همهم..انهم يبنوا حياتهم.....الحياه دى عبارة عن بيت بسيط بامكانيات بسيطة .. و اتنين قرروا انهم يعيشوا مع بعض يفهموا بعض و يحبوا بعض بجد...يدمجوا عقلهم و قلبهم و تفكيرهم فى خلق كيان اخر مستقل....يجيبوا و لاد...مش علشان دى النتيجة الطبيعية للجواز و بس ..علشان دى اول بذرة فى الحياه دى..اللى حاتقوم عليها..مشاعر تانية..احاسيس تانية...... يفكروا ...ازاى حيربوهم......ازاى يخلوهم عظماء ..كبار اوى..احسن منهم ..
.
يقدروا يبنوا نفسهم ..حياتهم ...مستقبلهم و مستقبل بلادهم ..هما اللى حيبنوه وحدهم والا انتوا اللى حتبنهولهم..ولا تبنوه معاهم....ازاى ربنا حيكون مديلكوا عقل و قلب و كيان بنى ادم و انتوا اللى المفروض تتحكموا فيه ..تصنعوه.. تخلقوه و متضيعهوش..تحافظوا عليه و تنموه و تكبروه..

كيف تطفيشين عريسا

طبعا مشكلة كبيرة بتقابلنا لما تلاقي واحد جاي يتقدم وانتي عايزة تطفشيه ومش عارفة, تعالوا نشوف ازاي نخلص من الورطة دي:

بنكون ف حالنا ومرتاحين وفجأة نسمع الخبر الصاعقة: جايلك عريس يابنتي يا دي المشكلة دانا مش عايزة اتجوز ياماما (على الاقل دلوقت) تعالى شوف الحق بنتك بتقول مش عاوزة اتجوز , هو كل مرة كدة بلاش دلع قابليه وبعدين ابقي قولي اللي انتي عايزاه

وهنا بيكون لا مفر انك تقابليه  ولو لقيتي انو مش مناسب وكلمة لا خايفة تقوليها ليحصل هجوم حاد مضاد من اهلك تعملي ايه؟ هنا بقى يجي دور خططنا البسيطة دي , بس يارب تنفع



اول حاجة ياست البنات:
جربي الاول تقولي لا بهدوء وتناقشي الاسباب مع اهلك ويا اما يقنعوكي يا تقنعيهم طيب و لا اقتنعتي و لا اقتنعوا و مصريّن تجربي الاول تعرفيه وعندهم امل, نتنقل بقى للخطوة التانية:

يوم مايجي مش لازم تلبسي اللي ع الحبل وتتشيكي لا خليكي عادية جدا والبسي اي حاجة وخلاص
بلوزة لونها سخيف, جيبة موضة قديمة جدا , طرحة لونها مش مناسب للطقم, الوان متنافرة, اي حاجة من الحاجات دي و لو كنتي فى اول مقابلة عرفتي ايه الالوان اللي بيكرهها البسيها ولو سألك ليه قوليله بحب اللون دة جدا وكل هدومي كدة عاجبك؟؟

بعد كدة بقى وانتو قاعدين طنشيه خالص ووجهي كلامك لأي حد موجود في القعدة دي الا هو,كلمي مامته مامتك اخوكي باباكي اي حد الا سيادته, ولو وجهلك اي كلمة ردي بالقطارة ويادوب كلمتين وبس

لو حب يفتح معاكي اي مجال للكلام صديه, وقوليله ردود تغيظ بس بذوق وادب, لو كان أهلاوي قولي انا بقى بشجع الزمالك, لو مش بيحب حاجة قولي انك بتحبيها جدا,مثلا مش بيحب الكوسة, قولي طب ليه كدة دانا بحب اعملها كل ماجي اطبخ , لو مش عاوزك تشتغلي قولي لا هشتغل وبحب الشغل جدا, حتى لو ناوية تسيبي الشغل بعد كدة المهم انك تطهقيه عشان يطفش

- لما تيجي تقدمي واجب الضيافة: هنا بقى حاجات كتير ممكن تحصل مثلا لو شاي او اي حاجة سخنة بلاش تدلقيها عليه حرام بلاش تجيبي لنفسك مصيبة, انما لو حاجة باردة مفيش مانع مش هتضره غير بس هدومه تتبهدل, المهم ماتوقعيش حاجة على الفرش بتاعكم ومامتك ذنبها ايه؟
لو هتقدمي عصير مثلا بلاش تقدميه ساقع قدميه سخن ولو شاي قدميه بارد لو بيحب القهوة او الشاي سادة قدميه سكر زيادة والعكس صحيح

اما لو كانت بقى المقابلة في شغلك واتعمل فيكي مقلب وخلوه يجيلك هناك تعملي ايه بقى ؟
الخطة بسيطة برضه خليه يستنى برة مكتبك كتير بحجة ان عندك شغل, ومتخليش السكرتيرة او الساعي يدخله الطعيه برة على الاقل نص ساعة او ساعة طيب نفرض مازهقش برضه؟ , يدخل ماشي, بس اول مايدخل اعملي نفسك مشغولة امسكي التليفون وكلمي اي واحدة من صاحباتك تسأليها عن اي حاجة تخص الشغل واتكلمي كدة على الاقل عشر دقايق بعد كدة ياستي لو فضل مستني برضه اتكلمي بالقطارة برضه, واعملي نفسك خارجة برة تقولي للسكرتيرة تجيبله حاجة ساقعة واقعدي برة شوية
لو ف عز الشتا قدميله عصير متلج, ولو ف عز الحر قدمي شاي او قهوة سادة او كوب كاكاو سخن مولع و ماتنطقيش خالص غير بس رد على اي حاجة بيقولها ويكون كلامك زي ما قلنا بالقطارة, ويادوب كلمتين وبس , لو بعد دا كله يامسكينة مفيش فايدة ومازال متمسك بيكي ومعرفتيش تطفشيه, يبقى شاريكي وعليكي انك تفكري تاني, يمكن, والبقاء لله بقى في حياة العزوبية بتاعتك, واتجوزي المحروس وامرك لله

نيجي بقى لشوية نصايح كده تنفع وقت اللزوم فحتى لا تفاجئي عزيزتي انك معروضة على عريس ليبدي رأيه فيكي فهناك عدة مؤشرات ودلائل التي قد توحي لك ان هناك عريس في الطريق فخذي حذرك ولا تسمحي لهم بمفاجأتك:

انذار: العريس قادم

مثلا ان تتصل بك خالتك اللي عمرها ماكلمتكو الا في المناسبات الوطنية لتسألك عن احوالك وتذكرك بأنك كبرتي وكأنها اكتشفت سر من اسرار الكون, ثم تسألك هل ارتبطتي ام لا, هذه اشارة واضحة لاتتجاهليها.
او ان يطلب منك عمك ان تزوريه لانك وحشتيه جدا , ونفسه يشوفك اوي, انتي التي تناولتي الغداء لديه من يومين فقط, اذن العريس يلوح في الافق

ومن الجائز ان تكوني في مشوار مع صديقاتك لتفاجئي بمكالمة من البيت على المحمول لتجدي اباك يسألك بكل براءة انتي فين, مع انه لسة موصلك لصديقاتك من نص ساعة بس, ثم يطلب منك سرعة العودة للمنزل عشان في ضيوف, متهيألي واضحة اوي دي.

أو قد يمنعك والدك في يوم من الخروج بحجة ان عمو فلان..فاكراه.. جاي يباركلنا على الشقة الجديدة, ولازم تكوني موجودة, دا باعتبار انك المرشدة السياحية لشقتكو, عموما كتير خيره الراجل بصراحة, لولا انه اتأخر قليلا, فالشقة (الجديدة)بقالها 15سنة, ولكن يبدو انه صبر حتى يضمن استقراركم في الشقة, وحتى كبر ابنه وبدأ في البحث عن عروسة

ولا يجب ان ننسى دور الام مع ابنتها والذي يكون غالبا في غاية الوضوح ( يابنتي انتي بقيتي عروسة).. او مثلا تيجي داخلة بيتكو تلاقي والدتك قاعدة مع واحدة عمرك ما شفتيها وتقولك تعالي سلمي على طنط عنايات, دي زميلتي من ايام الكلية , قابلتها صدفة في وسط البلد, يامحاسن الصدف, وسط البلد اللي الناس بتتوه فيه من بعض اصبح الناس تتقابل فيها صدفة, وتنظر لك طنط عنايات بإعجاب شديد وتهتف: بسم الله ماشاء الله تعالي ياعروسة, عروسة!!!! هنا قد يبدأ الشك, ولكنه يتاكد بعد يومين حين تتقمص والدتك دور الشيخة نادية وتقولك شفتلك حلم امبارح انما يشرح القلب, وتشرحلك بالتفاصيل الفرح, والفستان والزفة واوصاف العريس الذي هو مرعي ابن طنط عنايات!!!

كل ماتقدم ينذر بالخطر المحيط بك... فكيف تتصرفين؟؟؟

كيف ترفضين عريسا

خطة أ:الحجج التي تعينك على رفض هذا العريس :

- فأول تلك الحجج هي انك تريدين اكمال تعليمك .. أما لو كنت قد تخرجت بالفعل فتقولين لهم: لا لسة بدري.. هناك الماجستير والزمالة والدكتوراة, وجوائز الدولة التقديرية والتشجيعية والطحينية أيضا , ثم الحلم الاكبر بالحصول على جائزة نوبل في اي حاجة... ويديكي طولة العمر.

- هناك أيضا مقولة انك مش بتفكري في الموضوع دا دلوقتي... عشان في مواضيع اهم شاغلة تفكيرك مثل قضية اللاجئين وحرب الشيشان, وأزمة البنجر في الجابون.. وحين تحل تلك القضايا وينتهى ثقب الاوزون ستفكرين فعليا في الزواج.

- قد تتحججين ايضا بارتباطك الشديد بوالدتك, وأنك لا تستطيعين مفارقتها, وهذه ستكون هدية العمر لأبيك والذي سيقترح - بكل خبث - أن تاخذيها معك, وتكون هذه الطامة الكبرى للعريس الذي سيفر بمجرد سماع الاقتراح.

أما اذا لم يقتنع اهلك بكل تلك الحجج واصروا ان تقابلي الموكوس , فهناك عشرات العيوب التي يمكنك اختلاقها في اي شخص.

خطة ب: عيوب متتقدرش بتمن

- فإن كان بشنب فهو شكله وحش بالشنب, ولو كان من غير شنب فأنت لا تقبلين رجلا بدون شنب.
- لو كان تخين فهو بكرش وغير مناسب, ولو كان رفيع فهو هيكل عظمي وغير مناسب ايضا.
- لو كان يزوركم كتير فهو لزقة, ولو قلل من زياراته فهو لا يحبك.
- لو بيتكلم كتير يبقى رغاي ولو كلامه قليل يبقى طوبة.
- لو واثق في نفسه يبقى مغرور, ولو مش واثق تبقى شخصيته ضعيفة.
- لو سريع البديهة فهو متهور, ولو متأني يبقى تنح.
- لو بيفكر يحسن وضعه في الشغل يبقى طماع ولو مبيفكرش فهو فقري.
- لو استشارك في كل الامور فهو متردد وبريالة, ولو اتصرف من نفسه فهو ديكتاتور.
- لو صرف عليكي كتير يبقى مسرف, ولو صرف قليل يبقى بخيل.
- لو بيحب امه يبقى دلوعة ماما, ولو مش بيحبها فهو جاحد.
- لو بيغير عليكي فهو متخلف او مش واثق فيكي, ولو مش بيغير يبقى مقطف.

خطة ج:طريقة كلامه عن والديه

فهي تدل على مستواه الثقافي, وهي ايضا تلكيكة جديدة كي ترفضيه:

- مثلا ان كان يتكلم عنهما بصيغة: ابويا - امي فهو فظ غليظ لن يحسن التعامل مع فتاة رقيقة مثلك.
- أما ان كان يتكلم بصيغة بابي - مامي- دادي, فهو دلوعة ومايص ومايع ولا يصلح الا لرقص الباليه.
- أما ان كانت صيغته هي والدي- والدتي, فهو رسمي جدا كأنه يحدث مديره في الشغل.. ماينفعش.
- لم يبق الا صيغة بابا- ماما وهنا يصبح عاديا جدا وليس به شيء مميز ويكون مصيره الرفض ايضا.

خطة د: جدك كان قائد طابية ..لأ تبقى موش من مستوايا

يجب ان يستيقظ الغل الطبقي في اعماقك, , وعليكي ان تكني كل الحقد والكراهية لكل طوائف الشعب... وان تسترجعي ميولك الاقطاعية -حتى لو كانت امك بائعة فجل - وتكون طريقة كلامك بكل الاطة على النحو التالي:

- لأ ماتجوزش فلاح: طينة وزرع ومش بدوده.
- دا مش فلاح دا صعيدي
- ومش ممكن اتجوز صعيدي.. يطلع عليه تار ولا يطلعوا عليه نكتة.
- طيب في واحد سواحلي
- لا لا لا لا الا السواحلية رمل وسمك ورطوبة.
- طيب العريس بتاع القاهرة
- أنا اتجوز قاهري, تلوث وضوضاء وعشوائية.. مش ممكن.
- طيب بلاش القاهرة في واحد بدوي.
- بدوي ايه.. مستحيل... قال بدوي قال.
أما أي جنسية خارج حدود الوطن فهي مرفوضة تماما, مش ناقصة بهدلة, وعليكي انتظار كائن فضائي من اورانوس للزواج.

خطة هـ: التوافق.

. يجب ان تكونا متوافقين تماما في الافكار والمعتقدات والهوايات, فلو انه لا يحب نفس الموسيقى والطربين بالضبط دون اي اختلاف كأنه نسخة جينية منك فلترفضيه على الفور فأنتما غير متوافقين.

اما لو كان يحب نفس الموسيقى ونفس المطربين دون اي اختلاف كأنه نسخة جينية منك فلترفضيه ايضا فلا حاجة ان تتزوجي نسخة منك.. انت موجودة.
ويسري هذا على الكتاب والممثلين وابطال صيد السردين.. يجب ان يحب ماتحبين او لا يحب مش فارقة.. هايترفض هايترفض.

خطة و: برجك ايه؟؟؟؟!!

يجب ان تراعي توافق الابراج بينك وبين عريس الوكسة, فمثلا لو ان برجك مائي وبرجه ترابي فهذا يبشر بحياة مطينة بطين,  اما لو كان برجك مائي وبرجه هوائي فيدل هذا على حياة مليئة بالعواصف والاعاصير ودوار البحر,  أما زواج البرج الهوائي بالترابي فينذر بالبعثرة وتفرق الشمل اما بقى لو كان برجه ناري فارفضيه ايا كان برجك, فاحتمالات انه يولع فيكي كبيرة جدا وكما ترين يافتاتي فمهما كان فإن عريسك مرفوض مرفوض مرفووووض يا ولدى

النصيحة الذهبية:

اطلبي .. اطلبي..اطلبي
انتي العروسة فاطلبي ماتشائين.. اطلبي لبن العصفور وبيض الديك وقارورة من دمع التماسيح, واذا لم يلب طلباتك استمارة 6 علطول.. اكيد عارفة الاعلان الانتهازي بتاع " انا عايزة دي ودي ودي "
خليكي محدثة نعمة واخربي بيته, مش عايز يتجوز يدفع..

كيف تستعدي لمقابلة العريس

يا ترى لو جالى عريس اعمل ايه طبعا العريس وصلتلو عن طريق البحث عن زوج من خلال مواقع الزواج والتعارف واول حاجة بتخطر فى بالى , اتصرف ازاى , البس ايه و اتكلم فى ايه طيب و لو سالنى ارد اقول ايه و لو حاجة معجبتنيش فةى الكلام رد فعلى يبقى ازاى هو ده الموضوع اللى حنتكلم فيه النهاردة كيف تستعدى لمقابلة عريس

الخطوة الأولى – قبل اللقاء -  جهزي نفسك نفسيا ومظهريا
1-علشان ماتتعبيش نفسك وأعصابك على الفاضي ياريت تشيلي من دماغك فكرة إنك بضاعة جاي العريس يتفرج عليها لأن دي حاجة مش صح وحطي في دماغك إن ده جاي يتعرف على البنت اللي ممكن تكون شريكة حياته وإن دي حاجة مش عيب ومفيش منها أي تقليل من شأنك
2-حاولي على قد ما تقدري تخلّي أعصابك هادية جدا وتبعدي عن أي مصدر قلق أو توتر.. علشان التوتر ممكن يبان على وشك واحنا مش عايزين كده احنا عايزين عروسة زي القمر وياريت كمان قبل الميعاد ده تاخدي دش دافي
3-بعد كده ادخلي الأوضة عندك وابدأي في اختيار لبسك.. وعلى فكرة النقطة دي بتحير بنات كتيييير أووووي لأنهم بيحتاورا يلبسوا كلاسيك ولا لبس عادي
بصى أول مرة دي تلبسي لبسك العادي اللي انتي بتلبسيه وأنت خارجة.. يعني لو كنت بتلبسي بنطلون وبلوزة البسيهم بس ياريت البنطلون يكون قماش مش جينز أو لو كنت بتلبسي جوب وبلوزة البسيهم برضه وده علشان يشوفك على طبيعتك في اللبس وبلاش موضوع إنك تلبسي بدلة لأن دي هتخلي الحكاية تبقى رسمي أوووي وممكن تبيّنك أكبر من سنك واوعي تنسي تختاري الألوان اللي تكون مناسبة عليكي وتنور وشك
4-لو كان اللقاء ده هيتم في البيت فياريت ما تلبسيش كعب عالي قوووي وخليكي في الكعب اللي 3 سم (انا من رايي متلبسيش كعب خالص ممكن يكون قصير)
5-ياريت في اليوم ده ما تكتريش في المكياج علشان ما تبقيش عاملة زي عروسة المولد.. وخليكى بسيطة جدا في مكياجك يعني كفاية أووي إنك تحطي روج وترسمي عينيك بالكحل والآي شادو وتحطي ماسكرا و أحمر خدود .
6-خليكي متفائلة وتوقعي الخير علشان تلاقيه خير وتوكلي على الله وفوضي أمرك إليه، وادعي ربنا يوفقك في اللي فيه خير ليكي
أعتقد إنك لو عملتي الحاجات اللي قلنا عليها دي هتكوني فعلا استعديتي للقاء ده وتعالي نشوف اللي المفروض تعمليه أثناء اللقاء ده
الخطوة التانية - أثناء اللقاء نفسه
1-بلاش تشيلي صينية العصير في إيدك وأنت داخلة لأنك ممكن ترتبكي وتوقعيها على اللي قاعدين.. كفاية قووي إنك تدخلي بابتسامة بسيطة على شفايفك وتسلمي على كل اللي موجودين وعليه هو كمان.. واقعدي وخليكي شاطرة واختاري إنك تقعدي في الكرسي اللي يكون مواجه له علشان تقدري تشوفيه كويس لأن ده حقك الشرعي وخليكي واثقة من نفسك وخدي الموضوع ببساطة علشان يعدّي
2-لو مامته جات معاه ياريت تخلّي بالك منها وبلاش تكشّري في وشها وهي قاعدة.. خليكي مبتسمة ليها دايما حتى لو قالت حاجة مش عجباكي اوعي تردي عليها رد مش مناسب وكلميها عادي وحاولي تكسبي رضاها وخليكي ذكية وفكري في كل كلمة قبل ماتقوليها
3-وأنت قاعدة اتكلمي براحتك من غير تكلف وافتحي مجالات للكلام واسمعيه كويس وهو بيتكلم علشان تقدري تحكمي عليه
4-لو فيه حاجة تضحك يا ريت ماتضحكيش ضحك بصوت عالي أو ضحك هيستري كفاية قوووي ابتسامة بسيطة على شفايفك
5-خليكي جريئة ولو وجه لك الكلام ردي عليه بذوق من غير كسوف
كمان خدي بالك أوووي من انه  لو سمحت الظروف وقعدتوا مع بعض ياريت تتكلمي معاه في أمور عادية جدا.. زي مثلا البرامج اللي بتعجبك في التليفزيون أو عن حاجة تكون حصلت قريب وشدت انتباهك وابعدي عن الكلام في أي مواضيع تكون مسار جدل ولو تطور الكلام بينكم لأي مواضيع فيها جدل خليكي ذكية وبلاش يكون عندك تحيز في الرأي واسمعي منه وابدي رأيك بأسلوب لطيف من غير ما تحرجي نفسك أو تحرجيه
واوعي في أول كلام بينكم تسأليه أي أسئلة شخصية أو أسئلة محرجة زي مثلا إنك تسأليه إذا كان خاطب قبل كده ولا لأ أو مثلا مرتبه كام؟؟ لأن الأسئلة اللي من النوع ده ما ينفعش تسأليها في أول مقابلة
2-ولو كان اللقاء في مكان عام زي النادي مثلا أو خلال مناسبة ما فحاولي تقللي من نظراتك حول الأشخاص الموجودين في المكان وركزي في الشخص نفسه
الخطوة الثالثة -  بعد انتهاء اللقاء
بعد ما الناس تمشي اقعدى مع مامتك واحكى لها على اللي حصل وفكري معاها كويس وشوفي إيه اللي قدرتي تطلعي بيه من اللقاء ده.. لأن فيه حاجات حتى لو بسيطة هتكون بانت قدامك ولو مش قادرة تحكمي كويس ياريت تطلبي لقاء تاني علشان تقدري تحكمي على أساس صح.. وربنا يوفقك

هو انا متجوزتش لحد دلوقتى ليه

مع البحث عن زوج والبحث عن زوجة تعاولو نتابع قصة ام محمد
 بصوت مدوّ انطلقت زغروطة ام محمد لتتبعها عبارة عقبال عندك يا ام فاروق البت ابتسام بنتي جالها عريس انما ايه ..يتاقل بالمال..والخطوبة الخميس اللى بعد الجاى ان شاء الله..
ام فاروق: الف الف مبروك يا ام محمد ..ربنا يتمملها بخير يارب..
ام محمد : الله يخليكي يا اختي ..عقبال بناتك كده ان شاء الله ..

دخلت ام فاروق بيتها ورزعت الباب وراها وهى هتفرقع من الغيظ...وبقت عماله تكلم فى نفسها..يعني انتى يا محمد بتغيظني يعني علشان جوزتي بناتك التلاته وانا لسه بناتي قاعدين ..!
أم فاروق (بأعلى صوت) : انتو يابنات ,انتى يا بت منك ليها ..انتو يا مفاعيص..تعالوا هنا بسرعه..!
( من سن العشرين اسن التلاتين الست ام فاروق عندها خمس بنات ما شاء الله ..ربنا يخلي.. )
اجتمع البنات بعد ما كانوا سمعوا الحوار بين امهم وام محمد وهما عارفين الكلمتين اللى هياخدوهم فى جنابهم من امهم!
أم فاروق: بصوا بقى يا بنات ..انا جالى الضغط والسكر والقلب منكو..وخلاص مرارتي هتفرقع ده ان ماكنتش فرقعت !
بنات المنطقه كلهم اتجوزوا وانتو لسه قاعدين ..اعمل ايه بس ياربي؟!
قالوا ذوقّّّّّّّّّّّّّّّّي البنات جبتلكوا اغلى ميك اب واحسن لبس ودولاب كل واحده فيكوا يشهد وانتو اصلا قمرات من غير حاجة  وبرده مفيش فايدة سيبتكوا تلفوا وتخرجوا وتروحوا الافراح والحفلات ..وبرده مفيش فايدة قالوا محسدوين ومعملكوا عمل عملنلكوا احجبة ورقيناكوا ..وبرده مفيش فايدة!
قالوا مكاتب الجواز قدمنلكوا فى 1000 مكتب ومكتب وبردة مفيش فايدة قالوا يبقى التليفزيون هو الحل اتصلنا ببرنامج (بدل العريس الف) فى قناة (النصب العلني) ..وبرده مفيش فايدة قالوا يبقى مفيش غيرالنت و مواقع الجواز و التعارف جيبنلكوا نت واشتركتنا فى كل مواقع الجواز ..وبرده مفيش فايدة قالوا مواقع الجواز موضه قديمة , الفيس بوك هو الحل سييبتكوا تدخلوا على الفيس بوك على امل تعلقوا اى عريس..وبرده مفيش فايدة قولولي اعمل ايه بس يا ناس؟؟!!!!
يلا انتى وهى غوروا من قدامى..كل واحده تنزل دلوقتى ومترجعش البيت الا بعريس فى ايديها والا مش هتدخل البيت قوموا ..مش طايقه اشوف وش حد فيكوا صبرني يارب  نسيب الست ام فاروق على ما تهدى شوية  ..
وتعالوا بينا ندردش حبتين البنت بقت تحلم بالعريس اللى هيجي ياخدها على الحصان الابيض فى ليلة بيضا ويعيشوا عيشه كلها ابيض فى ابيض و الجواز يا بنات سُنة ربنا فى الأرض..يعني مش عيب ولا حرام اني اتمنى الجواز بالعكس ده من وصايا النبي صلى الله عليه تزوجوا فإني مكاثر بكم الأمم ، و لا تكونوا كرهبانية النصارى)
صححه الألباني
ومشكلة عدم الزواج موجوده من زمااااان بس مكنتش ظاهرة بالدرجه ..ولكن فى زماننا تفشت وانتشرت واصبحت ظاهرة بشكل واضح لاسباب كتييييييييييييييير جدااااااااااا والاحصائيات الاخيره بتوضح مدى السوء اللى المشكله بتتجه ليه كل يوم ويوم حيث كشفت دراسة حديثة صادرة عن الجهاز المركزي للتعبئة والإحصاء في مصر عن أن عدد من لم يسبق لهم الزواج في مصر بلغ 13.3 مليون منهم  7.6 من الذكور و5.7 مليون من الاناث..!!
وفيه احصائيات كتير جدا بتقول ان عدد البنات فى مقابل الولاد اصبح كبير وده من علامات الساعه زى ما النبي صلى الله عليه وسلم قال " ليأتين على الناس زمان يرى الرجل الواحد يتبعه أربعون امرأة يلذن به ، من قلة الرجال وكثرة النساء" صحيح البخاري

يمكن أغلب البنات عندنا فى مصر سن الجواز فيهم بيتراوح بين سن (18-29) تقريبا ..طبعا فى بنات بيتجوزوا اقل ونظرة المجتمع طبعا اللى الكل يعرفها للبنت اللى وصلت 30 سنة ولسه متجوزتش انها خلاص بقت عانس وجوازها اصبح شبه مستحيل خاصة فى الزمن ده ..ليه؟
اصل فيه غيرها كتييييييير ..نفس المميزات تقريبا وكمان اصغر منها سنا ,المشكلة الكبرى اللى بتقابل اى بنت هى مشكلة الضغوط من عدة اتجاهات ..اهمها..ضغوط من البنت نفسها..وضغوط من الاهل ..وضغوط من الناس..
اولا: ضغوط من نفس البنت:
وده غصب عنها مش بمزاجها..زى ما قولنا ان الزواج سنة ربنا فى الارض , وربنا سبحانه وتعالى خلق المراة ضعيفة وميالة للعاطفة محتاجه راجل يكون جنبها يعطف عليها ويحسسها بالحنان والامان ده غير فطرة الامومة اللى ربنا وجدها فيها..فالبنت جواها زيها اى بنت صاحبتها نفسها تتجوز وتبقى ربة بيت وتبقى ام وتعيش الحب الحلال..
ثانيا: ضغوط من الاهل:
ودى من الضغوط الكبيره على الاهل قبل ما يكون على البنت خاصة فى الزمن ده وفى ظل الظروف الصعبة اللى بيعشها الأهل..بتلاقى الاهل وخصوصا الامهات نفسها تشوف بنتها عروسة وتفرح بيها ونفسها تشيل ولادها وتلاعبهم ..دى مشاعر معظم الامهات ..بجانب ان فيه بعض الناس نفسها بناتها تتجوز علشان تخف عليهم المصاريف والاعباء شوية وناس تانيه حكم الاعادات والتقاليد مش راضية تجوز الصغيره قبل الكبيره فنفسها الكبيرة تتجوز علشان توسع الطريق لاخواتها..وهكذا..ده بيخلى الاهل مضغوطين وكمان بيضغطوا على البنت وزى ما شوفتوا فى اول الموضوع الست ام فاروق..!
ثالثا: ضغوط الناس:
الناس الناس الناس..الناس مش بتسيب حد فى حاله ابداااا ..وخصوصا فى الارياف وبين الستات وبالذات موضوع الجواز ده..مش عارفه فلانه لسه متجوزتش لحد دلوقتى ياترى ايه السبب يكونش مش عارف ايه ؟؟ ,وفلانة خطوبتها اتفركشت وعريسها عمل مش عارف وكلام الناس بيجرح ومش بيخلص!
الضغوط دى مع الشيطان مع النفس الامارة بالسوء بيدفعوا البنت انها توصل لدرجة انها عايزة تعمل اى حاجه مقابل انها تتجوز..او تشيل الضغوط دى عنها باى طريقه حتى ولو كانت الانتحار!!!!
يعني بعض البنات زى ما بنشوف وبنسمع كتير.. تكون ملتزمه وصاينة نفسها ومش عايزه تغضب ربنا ومع ذلك برده مجالهاش عريس لحد دلوقتى مع ان زميلاتها اللى مش ملتزمين او لبسهم على الاقل منيل بنيلة بيجلهم عريس واتنين وعشره وهى محدش قالها تلت التلاته كام ولا فكر يدق الباب..فيبدأ الشيطان يشكك البنت فى نفسها ..هو انا صح ولا غلط..طب لو صح امال ليه انا كده وهما كده؟؟
ويبدأ الشيطان يشوف شغله ويخيلها تتنازل واحده واحده ..من خمار لعباية وطرحة قصيرة ..وبعدين جيبة وبلوزه وميك اب خفيف ..وبعدين بنطلون ...وهكذا .........وبرده مفيش عريس وتبدأ تخرج وتلف وتروح هنا وهناك على امل ان حد يشوفها ويتقدم لها ..وبرده مفيش فايده!
تبدأ ترخص نفسها لو كانت فى كلية مثلا او فى شغل وتروح هى اللى تكلم الولاد وتتصاحب عليهم وده طبعا بنشوفه كتير ..وبرده مفيش فايدة , تدخل النت وتحط صورها على الفيس بوك وتكلم ده وتشيت مع ده وتدى ده رقم موبايلها ..وبرده مفيش فايدة ولو البنت مكنتش جميلة مثلا او مش واثقه فى نفسها ممكن تتنازل وتعمل اكتر من كده وانتو شايفين اكتر منى!

هو انا متجوزتش لحد دلوقتى ليه – الجزء الثانى

طيب ليه كده مفيش جواز برده؟؟!
المشكله ان البنت مش عارفة ان كل اللى بتعمله ده اسمه اخذ بالاسباب ..حتى ولو كانت الاسباب دى صح او غلط ..هى فاكرة ان الاسباب دى ..الجمال واللبس والخروجات والشات هى اللى هتجيب العريس ونسيت ان رب الاسباب سبحانه وتعالى هو اللى لازم يأذن علشان الاسباب تشتغل ومن غير ده يبقى حتى لو خدت باسباب الارض كلها واتبعت البحث عن زوج على مواقع الزواج مش هيجلها عريس برده


طيب ايه الحل دلوقتى؟؟؟؟
قبل ما نتكلم فى الحل..لازم نلفت نظر البنات لعدة نقط..
اولا: الشباب المحترم ابن الناس الطيبين لما يجى يدور على زوجه ليه عمره ما هيختار زوجة من الشات ..او بمكالمة موبايل..وعمره ما هيفكر فى يوم فى واحدة شبه الاراجوز او البلياتشو  او عارضة جمالها لكل حد ولو كانت أجمل واحده فى الكون اهم حاجه الدين ..اولا واخيرا..الدين والحياء هو اللى هيخليكي اجمل واحده فى نظر اى شاب ملتزم..
حترد واحدة و تقولى طيب ده كلامك انت ..انما اللى بنشوفه على ارض الواقع ان كل الناس بقت تختار بالجمال واللبس والشياكة واكبر دليل ان كل اصحابي اللى مش ملتزمين اتجوزا وانا الحمد لله كويسه ولابسه زى الفل ولسه قاعده؟!
طيب هسألك شوية اسئله وفكرى فيها كويس جداا..
تفتكرى الشاب اللى اختار بنت علشان جمالها ..لو حصلها اى حاجه ..مثلا طلعلها شوية حبوب فى وشها ومراحوش ..او لاقدر الله حصلها حرق او اى حاجه ..هيطيق يعيش معاها ؟؟!
تفتكري اللى اختار بنت علشان عجبته فى فرح او حفلة مش هيبص لغيرها ..ده بص لالف واحده زي ما بصلها ..ولا تفتكرى ده واحد ملتزم علشان يختار بالشكل ده؟
تفتكرى ان البنت اللى راحلها شاب عنده عربيه وعماره وفلوس وافقت عليه وهو حتى مش بيصلى هيعاملها بما يرضى الله وهيتقى الله فيها وهتكون عيشتهم سعيده؟؟
تفتكرى ان العريس اللى اختار الجمال وقلع عروسته الحجاب فى ليلة الفرح وخلاها ترقص قدام الناس ده راجل اصلا عنده نخوه هيحافظ على مراته ويصونها ويخاف عليها ؟؟
اه بنات كتير بيتجوزوا ..بس ايه اللى بيحصل بعد الجواز؟؟
مصايب وبلاوى ..وعيشه هباب..وده اللى بنشوفه وبنسمعه وما خفى خلف ابواب البيوت كان اعظم!!!
كام حالة طلاق فى المحاكم وكام مشكله وكام خناقه ..!
لان البيت اتبنى غلط من الاول..!
يا فرحتي البنت اتجوزت..!!!
سنة او سنتين او كام شهر حتى وتلاقيها اتطلقت!!
والمكشله تبقى اكبر من الاول لو معاها اولاد..!
والأدهى انها ممكن تكون عايشه عيشه لا تطاق ..نكد وهم وغم وضرب وخناقات ..ومجبره على كده علشان خاطر الاهل او مش عارفه تتطلق او لاى سبب كان..!
اسمعى حديث النبي صلى الله عليه وسلم علشان تعرفي ربنا بيرزق المتبرجات بعرسان ليه وانت لأ..!
قال النبي صلى الله عليه وسلم :
(إذا رأيت الله يعطي العبد من الدنيا على معاصيه ما يحب فإنما هو استدراج ثم تلا قول الله تعالى
[ فَلَمَّا نَسُوا مَا ذُكِّرُوا بِهِ فَتَحْنَا عَلَيْهِمْ أَبْوَابَ كُلِّ شَيْءٍ حَتَّى إِذَا فَرِحُوا بِمَا أُوتُوا أَخَذْنَاهُمْ بَغْتَةً فَإِذَا هُمْ مُبْلِسُونَ ] سورة الأنعام )
المحدث: الألباني - المصدر: صحيح الجامع
ربنا بيستدرجهم وهما مش حاسيين..ربنا يتوب علينا وعليهم قبل فوات الاوان..
ثانيا: اوعى علشان كبرتي فى السن او جوازك اتأخر ..اول ما عريس يجيلك ترضى بيه لو كان غير ملتزم ..انتي ممكن تتنازلى عن اى شئ ..عفش ,دهب , فرح..انما الدين لاء..احنا عايزين عريس صالح ياخد بايدك للطاعه ويعيش معاكى بالمعروف ويعاملك زى ما النبي كان بيعامل زوجاته صلى الله عليه وسلم..وتربوا ذرية صالحه تكون صدقة جارية ليكوا بعد وفاتكم..
ثالثا: اوعى تفتكرى ان كل واحد قالك بحبك وبموت فيكي يبقى صادق ومش بيكدب؟؟!!!
طيب ايه الحل ؟؟؟؟؟؟؟؟ انا زهقت من نفسى ومش عارفه اتصرف ازاى مع بابا وماما او مع الناس؟؟!
بصي يا اختي ركزى فى الكلام

اولا مع نفسك :
لازم قبل كل شئ تجديد التوبة لربنا سبحانه وتعالى عايزين يبقى عندنا شوية يقين حتقوليلى هندخل بقى فى كلام الشيوخ يقين ومش عارف ايه ده مش كلام شيوخ .. ده كلام ربنا اللى خلقنا وعارف مصلحتنا وكلام النبي الذى لا ينطق عن الهوى اللى ربنا ارسله رحمة لينا وللعالمين.. ده الدين بتاعنا ..اللى هدفه اننا نعيش احلى حياة انتى اكيد عارفه ان من شروط الايمان الايمان بالقدر خيره وشره..
يعني ايه؟؟ يعني كل اللى يجيبه ربنا كويس يعني اتجوزت الحمد لله ..خير,  الجواز اتأخر ..الحمد لله خير, متجوزتش ..برده الحمد لله خير لو ربنا كاتبلى عريس يبقى هيجلي هيجيلي ..انهارده ..بكره ..بعد شهر ..بعد سنه ..المهم انه هيجي وقت ما ربنا يشاء..
احد السلف كان بيقول كلام جميل اوى (علمت ان رزقي لن يأخذه غيري فاطمأن قلبي - رزقى مكتوب من يوم ما اتولدت ..محدش هيأخده غيري..يبقى اشيل الهم ليه؟؟؟؟؟ بل في حديث من اعجب الاحاديث اللى قريتها وناس كتير لو عرفوه المفروض يغير من تفكيرهم..ويخيلهم يبطلوا يشيلوا هم الرزق ..
يقول النبي صلى الله عليه وسلم :
إن الرزق ليطلب العبد كما يطلبه أجله - المحدث: الألباني - المصدر: صحيح الترغيب
يعني الرزق هو اللى بيجري ورانا علشان يوصلنا زى ما الموت بيجري وراكي يعني انتى عماله تلفي ورا العريس وهو بيلف وراكي ولو حد قالك مثلا انتى ازاى هتتخطبي او تتجوزى من غير ما حد يشوفك ؟؟ لازم تخرجي وتروحى هنا وهناك وتفرجي الناس  قوليله انا عندي يقين ان عريسى مقسوم لى  يجي ازاى دى مش بتاعتي دى ربنا سبحانه وتعالى اللى بيسبب الاسباب علشانها زى الاكل ما بيجيلي كل يوم وانا قاعده فى بيتي لحد عندي..بابا بيجيبه ..اى حد يجيبه ..المهم انه بيجي كذلك موضوع العريس واوعي تفتكري انك مهما لبستي او اتشيكتي او كنتى جميلة او كلمتى ولاد كل ده هيسرع جوازك..
يعني اوعي علشان الرزق اتأخر شوية تعصي ربنا علشان تطلبيه خليكي فاكره كويس  (ما عند الله لا ينال إلا بطاعته)
طيب انا ملتزمه او كنت مش ملتزمه وبفضل الله التزمت وغيرّت لبسي وحياتى وبقيت بطيع ربنا وصبرت كتير وجوازى متاخر برده؟؟؟ يبقى لازم تعرفى ان ده هو الخير ليكي ان جوازك يتاخر او (لا قدر الله ) انك متتجوزيش هو ده الخير زى ما قولتلك قبل كده ترضى انك تتجوزى وتعيشى فى هم وغم وجحيم وهتتمنى ساعتها انك تقعدى طول عمرك ولا انك تكونى اتجوزتى!

خلى الايه دى فى قلبك على طول :
(وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ)
ربنا هو اللى عالم الخير فين وهو ارحم بيكي من امك وابوكي لو عالم ان الجواز خير كان قدمه ليكي ولكنه يعلم ان تاخيره هو اللى خير علشان كده أخره يبقى خليكي فاكره (وَاللَّهُ يَعْلَمُ وَأَنْتُمْ لَا تَعْلَمُونَ)
ثانيا: مع الأهل:
الام والأب..فكرهم غير فكرك..بس ممكن تقنعيهم بالكلام اللى فات ده بس ناس كتير ايمانها ضعيف وبرده مش بيقتنعوا ..
اعمل معاهم ايه؟ اصبرى عليهم واوعي تزعقى معاهم او تزعليهم واتعاملى معاهم بكل ادب واحترام ورحمة ومتجادليش كتير علشان متتعبيش وادعى ربنا انه يهديهم ويرزقك الصبر عليهم والبر بيهم..
ثالثا: مع الناس :
اوعى تلتفتى لكلام اى حد الناس عمرهم ما هيبطلوا كلام سواء اتجوزتي او متجوزتيش سيبي الناس يقولوا زى ما يقولوا ولا يهز شعره فيكي انتي مؤمنه وعندك يقين وثقه فى الله انه عمره ما هيضيعك
واخيرا ولكنه ليس بأخير ..بل قبل كل شئ عليكي بــالدعــــــــاء ربنا قال (ادْعُونِي أَسْتَجِبْ لَكُمْ) ..
يعني الدعاء مستجاب ..خاصة بقى لو فى قيام الليل او بين الاذان والاقامه او الدعاء بظهر الغيب او دعاء الام لبنتها ..
قولي يارب..واطلبي الزوج الصالح من الله خزائن ربنا مليانة عرسان ..بس انتي قولي يا رب..
طيب ...انا بدعي بقالى كام سنه وحاسه انه مش بيستجاب ليا؟؟!
مين قال كده ..لو انت فعلا بتدعي بعد تجديد التوبه وباخلاص وبتاكلى من حلال يبقى ان شاء الله دعاءك مستجاب مستجاب مستجاب ..بس الاستجابه دى ازاى؟؟
اسمعى حديث النبي صلى الله عليه وسلم :
(ما من مسلم يدعو ليس بإثم ولا بقطيعة رحم الا أعطاه إحدى ثلاث
اما أن يعجل له دعوته واما أن يدخرها له في الآخرة واما أن يدفع عنه من السوء مثلها
قال إذا نكثر قال الله أكثر - صححه الألباني
يعني الدعاء مستجاب مستجاب ادعي ربنا وانتي على يقين بالاجابه اوعي تيأسي, واوعي تعصي ربنا علشان الزواج. ..
انتي عايزه تتجوزي علشان تعيشي احلى حياة واحلى حياة مش هتلاقيها الا فى طاعة الله..

حنتجوز امتى

الظروف هى اللى بتحكم تاخر حبيبك في انه يجي يتقدم لك بسبب ظروفه او ظروفك الاسباب زى انه مش لاقى شغل مش عارف يجيب شقه على قد فلوسه  بيحوش فلوس الشبكة مش معاه يجهز او كل ما سبق و من ناحيتك انتى ممكن يكون السبب انك تكملى تعليمك غير الاسباب السابقة ، لو كل الامور متوفرة و الخطوبة او الزواج متعطل لاي سبب اخر ، تقدري تقنعيه انه يتقدم لك باي اسلوب ولو ظروفه صعبة ومانعاه من انه يتقدملك يبقى ماينفعش تضغطى عليه و تساليه كل شويه هاتيجي تخطبنى امتى طالما عارفه كويس ايه اللى مانعه من انه يروح يخطبك ، و عارفه انه لسه السبب ماتحلش يا اما تسكتى و تستنى السبب لما يزول او تحاولى تساعديه في زوال السبب اللى معطله يعنى مثلا تساعديه فى انه يدورعلى شغل تدوري معاه على شقه كويسه كده لو في ايدك حاجه تساعديه بيها اعمليها مافيش، يبقى ماتضغطيش عليه و نظام انا كل شويه بيتقدم لى عرسان و مش عارفه اعمل ايه و الكلام ده لانك ممكن تحسييه  انك عاوزه تتجوزى و خلاص مش هامك تتجوزى مين .


 في بنات كتير كل اللى يهمها انها تتجوزمن خلال البحث عن زوج سواء عن طريق المعارف والاصدقاء او مواقع الزواج
لتكوين اسره بغض النظر عن العريس و لما ترتبط بواحد مش جاهز و يحبها ، اول ما يجيلها واحد جاهز بتسيبوا بحجه ان اهلها مش سامحنلها تفضل من غير جوازلو المساله كده بلاش ترتبطى احسن غير ارتباط رسمي او جواز صالونات لكن لو انتى مستنياه و بتساعديه وهو مقصر يبقى في كلام تاني.

 طيب مقصر ازاي ؟ بيشتغل و عاوز يسيب شغله مثلا رغم ان الشغل اللى هو فيه فلوسه كويسه او هو الشاب جاهز من كل حاجه و لسه بيقولك انا محتاج اكون نفسي الاول او جبتي له شغل كتير ممتاز لكن مافيش حاجه عجباه مابيعمرش في شغلانه بسبب سوء سلوكه لو هو ده الحال يبقى هو اللى غلطان . ساعتها لو سيبتيه يبقى معاكي حق , طبعا انا مش بقولك سيبيه بس كده حلال فيه اي حاجه تعمليها فيه, ساعتها تقدري تقولي له ان متقدملك عرسان و باباكى بيتخانق معاكي و ان ماما عارفة اننا مرتبطين و زعلانة منى عشان انت لسه ماتقدمتليش لحد دلوقتى هدديه بطريقه مباشرة انك هاتسيبيه لو ماتقدملكيش في خلال الفترة القادمة و حددي معاد ازاي تخليه عاوز يتقدملك في اقرب فرصه ؟

الراجل بيحب البنت العاقلة -  طبعا مافيش بنت عاقلة بس الرجاله لسه عندها امل - كل بنت عندها عزة نفس و كرامة و شايفة ان انوثتها لازم الراجل يحترمها و يقدرها كلام جميل اوي بس خفّى شويه, بلاش قلة عقل يعنى من قلّة العقل مثلا انك تغلطى و تبقى عارفة انك غلطانة و هو مخنوق منك موت ورغم ذلك مستنياه هو اللى يجي يراضيكي و لو مجاش يبقى مش بيحبك , دي حاجه تخلى الراجل يشد في شعره و بعدين تفضلى تغلسّي عليه و تطيني عشته كل فترة يعنى لو مش بيقولك كلام حلو بقاله فترة تروحي مزعلاه عشان تشوفى نفسك عزيزة عليه ولا لا.

تعرفى لو الراجل عارف انك بتفكري كده مش هايزعل و هايجي يصالحك و يمكن يضايقك متعمد و يعاند معاكي و يمكن في راجل تاني يقرر انه مايتعملش مع ستات تاني في حياته , لما تتصرفى بالطريقه دي الراجل مابيخودش باله تماما ان سبب قلبتك عليه دي قله الكلام الحلو و الدلع و لما انتى تجرّى شكله و يبقى واضح من الموقف انك انتى اللى غلطانه مش هايجي يصالحك لان عارف انه مش غلطان.

دي الطريقه اللى الراجل بيفكر فيها واقرب طريقه للوصول للهدف الخط المستقيم يعنى واحد زائد واحد يساوي اتنين و لما تكونى انتى غلطانة  و يجي هو اللى يصالحك بيكون عشان راجل طيب او انتى عرفتى تحسسيه بالذنب, حرام عليكوا حبيبته بتتصرف بالطريقه دي الرادل بيكون مش عارف السبب ايه و بمنتهى البساطة بيكبر دماغه و يقول لنفسه او لاصحابه دي قلة عقل بنات و يستنى لحد ماتتعدلى انتى و لو ماتعدلتيش و فضلتى على نفس المنوال بتديه انطباع انك واحدة نكدية و مقرفة و ممكن الموضوع يوصل انه يسيبك و رغم كده لما يسيبك بتعيطي .

 الشباب و ضغط الشغل لما بيكون عليهم ضغط في الشغل بتكون اعصابهم تعبانة و بيكون كل اللى همهم انهم يروحو البيت ياكلو
و ينامو . لما يكون مقصر معاكي بسبب انشغاله في شغله بيكون الحل انك تهيئي له الجو و تجذبيه ليكي ساعتها بيجي دورك انتى كزوجة او خطيبة ساعتها انتى لازم تقومى بدورك اللى هو " خرجيه من اللى هو فيه " هو ده دورك و الراجل لما بيكون مطحون في شغله او في جهازه اللى عاوز يكمله خلال فترة محددة عشان يعرف يتقدملك او بيجضر لجوازكم فكل ده عشانكم . بس الحاجات دي بتاخد حبيبك منك بس هو متاخد كده عشان بيحيبك , بيعمل كده عشان عاوز يتجوزك تيجي انتى بقى و تقلبي عليه في عز الدوشه دى
و تقولي له انت مابقتش تحبنى زي الاول ! يبقى حرام عليكي , لما يحصل حاجه زي كده لازم تقومى انتى بدورك و تخرجيه من اللى
و فيه . ازاي؟ تخرجوا في حتة هادية و ماتتكلموش في اي حاجة متعلقة باللى هو مشغول فيه و موتره و واخده منك يعنى مثلا ماتتكلموش في الشقة و اللى ناقص فيها و الى لازم يتعمل و لسه ماتعملش و لا اي حاجه من الحاجات دي خرجيه من اللى هو فيه.

انتى مع خطيبك في مكان هادي عشان تغيروا جو يبقى بلاش خالص اي لوم او عتاب من اي فيكم للتاني. انتم الانتنين مش انتى بس
ولا هو بس. و لو بدا الكلام يتحول لكلام جد و مواضيع شكلها كده هاتقلب بخناق او عتاب غيري الموضوع انتى و قولي لى احنا جايين عشان نغير جو مش عشان نتعاتب. لما تعودي حبيبك انه يجري عليكي لما يكون مخنوق. بغض النظر اذا كان هو الصح و لا الغلط .
و يمشه من عندك مرتاح نفسيا حتى لو كان هو اللى غلطان. عمره ما هايقدر يبعد عنك ابدا. و هايتمنى يتقدملك انهارده قبل بكره.

يعني ايه جواز زيرو ؟؟

يعني كل اللي نفسك فيه .. نفس شكل الجواز من غير ذرة حب يعني تحلم بصيدلة وتلاقي نفسك في حاسبات يعني تعشق البحر وتصيف في الواحات, وهي دي العيشة مع جواز زيرو

الحب والبحث عن زواج هو هذه الحلوى الملونة ذات الرائحة الذكية والطعم الحلو التي تغلف العلاقة الانسانية بين شخصين فتواري عيوبهم الخارجية والداخلية .. فتنظر اليه بكرشه المتدلى وصلعته البراقة وافتقاره لادني مستويات الذوقيات وتوشك ان تطلق صرخة مدوية ولكن ما ان يصل تأثير كبسولة الحب الي المخ حتى تخدر عقلها وتعطي له اجازة مفتوحة وتسدل ستار العمى علي عينيها ويٌخيل لها انها امام توم كروز بشعره الكثيف البراق وجسمه المتناسق الممشوق و تري فيه كرم حاتم ورومانسية قيس وشهامة عنترة

 

الزواج هو ذلك الرباط المقدس بين الزوجين .. سوبر جلو .. كلما قرر احد الطرفين الانفصال لاستحالة الحياة بينهما يظهر الجلو (المقاريض اولادهم) ويقولوا له " هتسيبنا لمين يا بابا " .. فيتراجع عن قرارة الاهوج من اجل الصالح العام و رفقا بالاصلاحيات ودور اعادة تاهيل النشء.



زواج زيرو من مواقع الزواج هو زواج خالي من الحب (واجهة اجتماعية) فيه تحصل البنت علي لقب (مدام) و ترتدي دبلة بالبنصر الايسر .. وتبرزها في اعين صديقاتها ستين مرة في الدقيقة وتتحدث عن زوجها بمناسبة وبدون كي تعلم الجميع انها حظيت بفارس الاحلام وبمجرد عودتها الي البيت تعامله معاملة سنية الشغالة والاكل عندك فى التلاجة ادخل سخن وكل انا اتغديت بره.


زواج زيرو هو ان يحصل الرجل علي المقاييس المثالية لفتاة الاحلام .. تلك العيناها أصفى من ماء الخلجان .. تلك الشفتاها أشهى من زهر الرمان .. الخ .. ليضع صورتها فى الفيس بوك ليري اصحابه كم هو محظوظ لانه حصل علي جميلة الجميلات.. لن يقبل بصورة تخالف خياله ولو ملليمتر وما الدافع الذي يجبره علي تقبل العيوب .. فهذا زواج خالي من الحب .. اذا فهو خالي من اي تنازلات .. معادلات رياضية بحتة لابد ان يتساوي طرفيها ..



جميلة المُحيا + صغيرة السن + من عائلة كريمة مشهود لها بالاخلاق = عروس ممتازة

ومع طعني في صحة المعادلة التي هي مُسلمة حفرتها العادات والتقاليد في تلافيف عقلنا الباطن .. الا ان هذا الزواج لازال زواج زيرو .. التقاء المصالح والرغبات هو ما شكل العلاقة لا التقاء الارواح .. فيتزوجها ويحصل علي تمثال من السكر الابيض .. جميل الشكل والطعم ولكن بلا روح .. والاغرب اننا لو اضفنا قليلا من السكر (الحب) لهذه العلاقة فنجد الشخص يتغاضي عن مُسلماته ويضرب بها عرض الحائط .. ويقبل بمطلقة بعد ان كان يرفض فتيات كثيرات سبق لهن الارتباط بخطبة .

انه الحب .. ان تحب زوجك (سواء تزوجته عن حب او احببته بعد الزواج) فانت قطعا محظوظ لانك ضمنت مخدر عقلي ممتد المفعول .. يستر عيوب زوجك عنك فيقلل من ادراكك لها ومن ثقلها علي نفسك وبالتالي تستقيم الحياة وتستمر .. اما اذا نزعنا الساتر والمخدر فما الذي يجبرك علي تحمل هذا الكائن الفج الذي يفتقر لاي جمال معنوي او حسي ؟!



واذا كان الزواج الزيرو بمثل هذه القسوة والمادية فلماذا نستمر فيه ؟؟ واذا كنا علي دراية تامة بماهية الحب وخيالاته وتهيؤاته .. فلما لا نحكم عقولنا وقلوبنا فى الزواج الزيرو لنمنحه لمسة سكرية تخفف من مرارته و نمنحه فرصة عادلة متوازنة لعله يأتي لنا بالزوج المناسب

يــــعــنــــى ايــــه جـــواز

فى الحقيقه يا جماعه انا اخترت النهارده اتكلم عن الجواز ومواقع الزواج  مش من الناحيه الشرعية ولا احكامه ولا كل ده انما من جانب مختلف ورؤية شخصيه فالجواز ده نظام اجتماعي قننه الشرع , يعنى ايه ؟ يعنى اساسا الزواج كان موجود من قبل الاسلام لكن كان فى اخطاء وعادات كتير غلط وجه الاسلام حط قوانين للنظام الاجتماعي للبحث عن زوج ده ونظمه .



طيب بعد اذنكم عايزه اتكلم من خلال الايه دي شويه
ومن اياته ان خلق لكم من انفسكم ازواجا لتسكنوا اليها وجعل بينكم مودة ورحمة ان في ذلك لايات لقوم يتفكرون"
سورة الروم - سورة 30 - آية 21
معلش ركزوا بقى معايا وتعالوا ناخدها حته حته
ومن آيته ان خلق لكم من انفسكم ازواجا : الايه معتبره فكرة وجود ازواج دي آيه من ايات الله فى خلقه معجزه يعنى (والازواج هنا من الجنسين يعنى )
ازواجا لتسكنوا اليها : شوفوا السبب من وجود الازواج ايه السكنــــى
يعنى ايه سكنى : لما نقول سكن الشيء يعنى استقر مكانه السكنى هنا استقرار واطمئنان وهدوء نفسي
وجعل بينكم مودة ورحمه : هنا بقى الحقيقه انا وقفت قدام الكلمه دي شويه كده شمال ويمين وكلمة جعل خصوصا
بنلاقيها دايما مذكوره فى القرآن مع المسلمات والافعال الالهيه زي وجعلنا الارض مدادا .... مثلا
والايه دي كمان حتى فى اقران بين خلق السموات والارض والازواج على اعتبار ان وجود الازواج منحه الهيه برضه
فاطر السماوات والارض جعل لكم من انفسكم ازواجا
سورة الشورى - سورة 42 - آية 11
نرجع للايه الاولى بتاعتنا
وجعل بينهم موده ورحمه .... وكانها منحه الهية .. الى هى ايه المنحة؟ المودة والرحمة
يعنى دي موجوده بامر الله بس احنا الى مش بنقدرها ولا بنراعيها احنا بنهملها جايز بننساها بنبوظها اي حاجه بقى
الموده والرحمه : والله العظيم موده ورحمه مش خناق وعراك ومحاكم وحرب اهليه فى البيوت
وفى نهاية الايه بقى بيقول : ان فى ذلك لايات لقوم يتفكرون
يتفكرون عشان خاطري تتفكرون شويه وتعرفوا يعنى ايه زواج وعشان ايه
وفى ايه تانيه برضه ذكر فيهاالزواج لكن تعالوا نقرا الايه كده وقلولي حاسين ايه من معناها
والله جعل لكم من انفسكم ازواجا وجعل لكم من ازواجكم بنين وحفدة ورزقكم من الطيبات افبالباطل يؤمنون وبنعمت الله هم يكفرون
سورة النحل - سورة 16 - آية 72
الايه بتعد بعضا من نعم ربنا عليكم الى المفروض نشعر بها بالامتنان لله عز وجل شايفين عدوا كده
جعل لكم من انفسكم ازواجا
ومش بس كده كمان من ازواجكم رزققكم اولاد
ومن الاولاد احفاد
خلاص بيقيتوا قبيله ؟
طيب ورزقكم بالطيبات كمان عشان تعيشوا وتستمتعوا بحياتكم
وبعد ما ربنا عد لنا جزء من نعمه الايه بتسالنا بعد كله ده وبتعجب : افبالباطل يؤمنون وبنعمت الله هم يكفرون
شايفين القرآن ازاي بيصور الزواج والازواج كنعمه من نعم ربنا علينا ؟ واحنا من اول ما يقابلنا مشكله فى حياتنا نقعد نردد الاسطوانه اياها بتاعة يجى الى عايز يتجوز يشوف ما كنا حلوين بلا جواز بلا قرف
وكلمه بيقولها جايز بهزار وجايز بجد
وجايز فى وقت هو فيه مضايق اوعى تتجوز يا ابنى خليك كده فى هوى نفسك بلاش وجع قلب ادينى باقول يا ريت الى جرى ما كان
وهى تقول ما تستعجليش يا اختي على الجواز بكره تتجوزي وتقولي ولا يوم من ايام بيت اهلي تروحي تجيبى واحد يتحكم فيكى ويقرفك
لييييييييييه.

مين بس قال كده جايز المتجوزين بيقولوا الكلام ده كده هزار جايز جد جايز هما فاشلين فى حياتهم بس حرام عليهم ومش من حقهم ابدا يسودوا الدنيا فى عين الشباب عشان فعلا الكلام ده بياثر عليهم وحقيقى بقت مشكلة العنوسه تكاد تكون فى حالات كتير هى عزوف عن الزواج مقنع غير العزوف الصريح كمان ودي مشكله كبيره بيتولد منها مشاكل اكبر لاتخفى على حد ابدا
الرسول عليه الصلاة والسلام قال :
الدنيا متاع . وخير متاعها المرأه الصالحة -  رواه مسلم عن عبد الله بن عمرو بن العاص
اقروا الحديث ده واحمدوا ربنا واشكروا فضله واسعوا فى مناكبها لحد ما ربنا يرزقكم وربنا يكرمكم جميعا ويوسع عليكم ويرزقكم الازواج الصالحين لو ما كانش عندكم ويبارك لكم ويصلح ما بين اديكم لو كان عندكم ازواج

معنى الرجولة فى عين الزوجة - الجزء الأول

سنة أولى جواز: الناس فاكرة ان ده العسل بس وبعد الأولاد خلاص
الناس فاكرة ان الحب بس في السنة دي وبعدين بيقل

مين قال؟؟؟ دايماً فكرة بتيجي في بالنا ؟؟ ليه الناس متعقدة من الجواز وشايفاه مش بصورته الطبيعية ؟؟

عشان بأختصار الناس مش عارفة يعني ايه جواز ويعني ايه متعة الجواز ويعني ايه سعادة في الجواز ويعني ايه حب في وما مارينا به  فى البحث عن زوج اوالبحث عن زوجة  من خلال مواقع الزواج



مانخدش حد من الناس قصاد عينينا انه عينة , لأ احنا نعمل ميزان نوزن عليه , عشان نمشي صح , الميزان ده مش تجارب الناس , لأ الميزان ده يكون اللي يرضي ربنا , واللي عاش عليه رسول الله صلى الله عليه وسلم

السعادة مش كلمة , السعادة عطاء السعادة حب السعادة اولاد السعادة زوجة صالحة السعادة أم لأولاد السعادة عيشة فيها رضا

كل اللي يجيبه جوزي حبيبي حلو , وكل الأكل اللي تعمله مراتي حببتي حلو , مافيش حاجة اسمها سنة اولى جواز وسنة عاشرة جواز

الجواز جواز من اوله لاخره

مهما كانت ضغوط الحياة , مراتك ليها حق عليك مهما كنتم في ضيقة مالية , جوزك له حق عليكي

مهما كنتم عايشين مش مرتاحين , بس في فرق بين ناس مش مرتاحة وسعيدة , وناس مش مرتاحة ومش سعيدة

الانسان ممكن يتعب في الشغل ويكون مش مرتاح فيه بس على قلبه زي العسل

احنا عايزين نقول ان سنة أولى جواز

زي سنة مليون

الفرق الوحيد ان اول سنة بيقى مافيش اولاد , وبعدين الأولاد بتيجي والمسؤلية بتكبر وكل ما بتزيد المسؤلية كل ما تعلقنا بربنا بيزيد لانه هو الرزاق يبقى نشيل هم ليه؟؟؟

آه بعد الجواز الست بتتخن شوية والراجل نفس النظام , ظبطوا مع بعض واعملوا رياضة , اعملوا اللي يرضي التاني , ماتقفوش عند نقطة , اتحركوا , ساعدوا بعض شجعوا بعض انكم توصلوا للي انتم عايزينه مع بعض

الاولاد : بعد الجواز بيقللوا فرص اختلائكم ببعض , يبقى الحب طعمة أجمل في الفترة دي لانك حتسرقوا وقت بسيط , بس الوقت ده حيديلكم طاقة وأقبال على الحياة الحلوة اللي اكيد حتحسوا بحلاوتها

مش معنى ان الانسان يعيش في الدنيا انه مايكونش مرتاح ولا سعيد , ممكن يكون تعبان بس سعيد , لان الاسلام دين السعادة والحب وكل حاجة حلوة , رسول الله صلى الله عليه وسلم تعب , بس كان سعيد

احنا هنعيش عشان ندخل الجنة سوا , وندخل اولادنا معانا لاننا هنعلمهم صح ونربيهم صح تربية اسلامية ونرضي بيهم ربنا , ونعلمهم طعم السعادة

نتفق بقى , ازاي نربي الأولاد , مين حيذاكرلهم انا في الشغل طول الوقت , وكل زوج حسب مواعيد عمله ويوم اجازته , كل شئ يتنسق من البداية , كل شئ يتعمل حسابه , وربنا هو المعين وهو الموفق

يلا مش عايزين نضيع ثانية في عمرنا , ونعمل قانون من جديد ونغير فكرتنا عن الجواز حتى لو كنا عايشنا الزواج المر عارفين له مر ؟؟؟ عشان عايشناه زي ما الناس عاشته بدون ميزان؟؟ والميزان زي ما اتفقنا , اللي يرضي ربنا , واللي عاش عليه رسول الله صلى الله عليه وسلم

مافيش حاجة اسمها سنة أولى جواز , لكن في حاجة اسمها جواز على طول حب على طول وكاننا في شهر العسل اتزوق لجوزي كاني يوم الفرح وكل يوم ارضيه بشكل مختلف البس لجوزي واغريه واحسسه انه ملك في بيته, اعيش لمراتي واحبها وما اتأخرش عنها في طلباتها طول ما انا قادر عليها وطول ما الطلبات دي مهمة بالنسبالها والطلبات دي ليها فايدة

وانتي اطلبي من جوزك في حجم قدراته والحاجات اللي يقدر عليها اتفقوا عشان ماتختلفوش , عيشوا الحب مدى الحياة  مافيش حاجة اسمها مراتي عجزت , لكن في عشرة وفي حب سنين

مافيش حد بيفضل على حاله ما انت كمان شعرك ابيض وانت كمان عجزت , بس كل فترة في حياتك ليها طعم جميل لازم تعيشوا وتوصل الاحساس ده لمراتك بالشكل المطلوب , ماتطلبش منها فوق طاقتها , وماتطلبش منها حاجة ماتقدرش عليها وماتطلبش منها شئ يغضب ربنا

وربنا يهنيكم وتحبوا بعض مدى الحياة , وتعيشوا كل ايامكم عسل بأقل كلمة ممكن تصنعي ضحكة على وش زوجك وكل في ميزان حسناتك
وانت بكلامك الحلو واخلاقك الحلوة تقدر تحرك الجبل , وتقدر تعمل كل شئ نفسك فيه بس انت اتقي ربنا فيها وبإذن الله حتعيش سعيد مدى الحياة

مهما كبرنا ومهما تخنتي او انا تخنت , مهما عجزتي وعجزت , نقدر نخس , نقدر نحس اننا شباب بحبنا لبعض

نقدر نعيش ونرضي بعض , لازم كل دقيقة تبقى مختلفة , تبقى جديدة , فيها شئ جديد كلمة جديدة لبس جديد نروح مكان جديد , نحب بعض بشكل جديد , نعمل تغيير دائم عشان مانحسش ثانية بأي ملل

مع التزامنا بطاعة ربنا و بمسؤليتنا في الشغل وتربية الاولاد , وانا عارف الاولاد بيسرقوا الوقت بس على قلبكم زي العسل , وانتم كمان اسرقوا وقت جميل واخطفوه وحبوا بعض فيه واعملوا كل اللي نفسكم فيه

في ثانية بألف دقيقة وفي ساعة بألف يوم , وفي يوم بألف سنة

الوقت مش بطوله , الوقت باحساسه , عيشوا سعداء واخطفوا كل وقت وكل ما السن يزيد والمسؤليات تزيد , الوقت اللي حتختلوا ببعض هيقل , بس حبوا بعض قدام الاولاد بالصورة المناسبة يعني معاملة حلوة كلام حلو ابتسامه حلوة , الاولاد محتاجين بيت مستقر عشان يقدروا ينجحوا ويتفقوا مش يبقوا معقدين وكونوا قدوة ليهم في كل شئ , في طاعة ربنا في حب الناس وفي المعاملة الحلوة والاخلاق الأحلى

مش عايزين حد يقول ان ده كلام خيالي , احنا ليه مش بنتقدم عشان مش بناخد بالاسباب , عشان مش بنفكر صح , طيب ليه مانكونش سعداء في الجواز؟؟ يبقى لازم نتفق ونعرف السعادة فين ونجري وراها عشان نطولها ؟؟ ناخد بالاسباب يعني نشوف سبب الشئ ونعمله , ومافيش اسهل من السعادة بس نطبق , نضغط على نفسنا شوية يمكن نتعب عشان نتعود نعيش صح , بس في الاخر النتيجة سعادة في سعادة بإذن الله وثقوا في الله وبإذن الله يتحقق كل شئ نفسكم فيه بفضل الله وبقدرته ورحمته بينا وكرمه علينا

وربنا يسعدكم يارب

معنى الرجولة فى عين الزوجة - الجزء الثاني

اهم شئ في موضوع الجواز : الاساس اللي مبني عليه

ماينفعش نبني عمارة من غير اساس ماينفعش نعيش وخلاص
ولانتهم مواقع الزواج والتعارف التى تساعد البحث عن زوجة والبحث عن زوج بأنها هى السبب فى المشاكل الزوجية 

يبقى لازم في بداية الجواز نتفق على بعض الأشياء عشان نعيش مرتاحين في حياتنا , عشان مايبقاش قدامنا أي عقبات , عشان مايحصلش طلاق مبكر , ولا مشاكل تنغص علينا الحياة



طيب ينفع الاتفاق ده يتم بعد الجواز؟؟ بعد ما وقعنا في مشاكل كثيرة ؟؟ بعد ماحصل حاجات صعبة مابين الزوج والزوجة؟؟ بعد ما اتعودنا على اسلوب ونظام معين للحياة؟؟ بعد ما عيشنا عمر بحاله جايين نعمل ده دلوقتي؟؟؟؟

الأجابة : نعم

ينفع : عشان نلحق اللي باقي من عمرنا
ينفع : عشان نصحح الأخطاء اللي وقعنا فيها قبل كدة
ينفع : عشان نرجع أي ثقة اتهزت ما بنا
ينفع : عشان نرجع الصلة ما بنا من تاني
ينفع : عشان نرجع في أجمل صورة مع أولادنا من تاني
ينفع : عشان نكون قدوة للناس
ينفع : عشان في الأول وفي الأخر نرضي ربنا اللي بقالنا كثير مش بنرضيه بعلاقتنا

طيب جميل جداً , بس نعمل ايه؟؟
نعمل دستور لينا , نعمل قانون للأسرة داخل الأسرة قد يكون هذا القانون , ويكون ده في ورق يبقى في البيت كل ما نبعد نرجعله تاني عشان نرجع تاني للصح هنبدأ على طول

قبل سنة أولى جواز

أحنا محتاجين نتفق على حاجات مهمة جداً

أنا الراجل : يعنى انا اللي هصرف في البيت
أنا الراجل : يعني احبك واموت فيكي واكفيكي نفسياً وكل حاجة
أنا الراجل : يعني اعاملك بما يرضي الله وما اغلطش فيكي
أنا الراجل : يعني انا اللي هحافظ عليكي وعلى الأولاد
أنا الراجل : يعني انا اللي هحميكي من أي شئ
أنا الراجل : يعني انا مستشارك في كل مشاكلك
أنا الراجل : يعني حبيبك الأول والوحيد في الدنيا
أنا الراجل : يعني انا اللي معاكي نعبد ربنا ونحبه ونطبق سنة رسول الله صلى الله عليه وسلم
أنا الراجل : يعني انا اللي يتسمع كلامي
أنا الراجل : يعني انا اللي اود أهلك وأخليكي توديهم وتزوريهم
أنا الراجل : يعني اذا احتاجتي حاجة تطلبيها مني طول ما هي في استطاعتي
أنا الراجل : يعني انا اللي عايش ليكي ولحبك ولرضا أمي وأبويا
أنا الراجل : يعني طول ما انا مكفي البيت مافيش داعي لشغلك
أنا الراجل : يعني انا اللي من حقي اقولك تروحي فين وماتروحيش فين
أنا الراجل : يعني انا المسئول معاكي في تربية الأولاد و تسلم ايديكي لما تقدملي أي حاجة بحبها

حاجات كثيرة مش بتتنتهي , وتتفقوا مع بعض اذا كان في نقط اخرى

أنا الست : يعني البيت مسئوليتي
أنا الست : يعني اعيشلك واحبك واموت فيك واكون سندك وواقفة جنبك
أنا الست : يعني معاك على الحلوة والمرة وعلى قد أمكانياتك
أنا الست : يعني هكون قنوعة ومش هقولك هاتلي هاتلي وانا عارفة انك مش هتقدر على الحاجة دي
أنا الست : يعني هحافظ على فلوسك ومش هجيب شئ مش ضروري مش في وقته
أنا الست : يعني مش هخليك تحس الا بطعم السعادة حتى لو انا من جوه بتقطع ومتضايقة
أنا الست : يعني هختار الوقت المناسب لكل موضوع اكلمك فيه
أنا الست : يعني هشيل أمك في عينيا وهقولها "يا ماما"
أنا الست : يعني عارفة يعني ايه امك في حياتك , يعني ايه حبك ليها
أنا الست : هخليك تحافظ على علاقتك بأهلك واقويها معاك ونصل رحمنا سوا , ونروح سوا لأهلك وأهلي وقرايبك وقرايبي
أنا الست : يعني هحافظ على نفسي , وهسمع كلامك , وهاعيش ليك ومعاك
أنا الست : يعني هخليك ازاي تحبني وتموت فيا , والبسلك اللي بتحبه واعمل كل اللي انت عايزه
أنا الست : يعني اكبرك في عيون الناس , يعني اعيشلك واعيش للأولاد بكل حب
أنا الست : يعني محتاجة منك كل حنان وحب , زي بالظبط ما انت عايز اديلك حنان وحب و تعيش وتجيبلي يا حبيبي لما يجيبلك حاجة بتحبيها , او حتى مش بتحبيها المهم ماتكسفيهوش

حاجات كثيرة مابتنتهيش برضة , تتفقوا عليها وتضيفوا كل اللي نفسكم فيه

طيب

في حاجات مشتركة

المشاكل مابنا تتحل مابنا يعني أهلي واهلك برة الموضوع
المشاكل اللي بنا تتحل في نفس اليوم عشان كل ما يوم يفوت عليها الشيطان بينفخ فيها ويولعها زيادة
نعمل كل اللي يرضي ربنا واهم شئ نتفق فرحنا هيكون ازاي؟؟ عشان مانكررش غلطات الناس ونعصي ربنا زي معظم الناس ما بيعصوا ربنا في اليوم ده وحقولك نعمل ايه

نتفق سوا على كل الحاجات انتي بتحبي ايه , وانا بحب ايه , انا بكره ايه , وانتي بتحبي ايه , انا الكلمة ليا , وانتي حتتقبليها بحب , لاني حتناقش معاكي مش حقولك على شئ لأ لمجرد انه لأ , لاني ليا نظرة بعيدة , ولازم اوضحلك النقط دي , وفي نقط ممكن اخفيها عليكي اذا كان في توضيحها جرح ليكي او لحد يهمك

نتفق من الاول عشان مانختلفش
نتفق على كل شئ عشان نعيش مدى الحياة في سعادة
نتفق عشان نعيش ونعرف نشتغل ونحب بعض ونقاوم الدنيا
نتفق عشان نرضي ربنا في كل حياتنا ومع اولادنا الي ما لا نهاية

ذكريات ومواقف أول ايام الجواز(الحلقة الأولى)

يا ترى يا بناتيت  فاكرين أول أيام جواز لما كانت كل واحدة مننا لسه عروسه جديدة وزي القمر أكيد أكيد فى أول جوازك حصل منك مواقف كتير منها اللي بيضحك و منها اللي بيخليكي تقولي علي نفسك إيه اللي أنا كنت بعمله ده

 خلينا نفتكر كده  شوية مواقف جامدة اللي ممكن تحصل في أول ايام الجواز , طبعا الواحدة اول ما بتتجوز بتكون لسه عروسة ننوسة كده مدلعة وايديها ناعمة ولسه متعرفش يعنى ايه جواز ولا شغل بيت ولامسئولية ولا اى حاجة من الشغل ده نهائي شوية تلاقى المطبخ
و مسح وغسيل ومواعين وهدة حيل يعني بتبقي السكينة سارقها، فبتفوق كده وتصحصح وتبقى فريش

وتعرف انها كانت مطلعة عين مامتها وباباها وقاعدة حاطه رجل على رجل ولا هى هناالمهم ان الواحدة لما بتفتكر بتقعد تترحم على الايام الخوالى و بتحاول جاهدة انها تعمل اى حاجة فى البيت علشان يقول عليها شاطرة وست بيت تمام

تعالو نفتكر شوية بعض المواقف اللى حصلت لاى حد مننا فى اول جوازها زى مثلا اللى كان جوزها بيحب العصير اوى

وأنا بقول كان لاني معتقدش أنه بعد الموقف ده لسه بيحب العصيرالمهم كانت تعمل عصير يكفى مصر والدول الشقيقة والمجاورة كلها وتحطه فى التلاجة وكانت تقول يلا علشان متعملش كل يوم وهو يعنى هايجراله ايه وكان يقعد بالأيام في التلاجة وتروح تقول لزوجها العزيز وهى بترقق صوتها زى الضفدعة

هى : اجيبلك يا حبيبى العصير اللى فى التلاجة تشربه ؟!

هو: عصير هو فين العصير ده يا امى ؟!

ده بقى مخلل وحمض وعفن وريحته طلعت انتى فكرانى البلاعة اللى بيدلقوا فيها بواقى الاكل طب اعزمى عليا بحاجة عدلة مش عفنت وماتت من شهور

هى : لا يا حبى على فكرة هى لسه ماماتتش والا كنت دفنتها

هو : يا مثبت العقل فى الراس يا رب

قالت فى نفسها معلش بتحصل اما اطلع الموهبة المدفونة ... واعمله اكله محصلتش راحت اشتريت فرخة وخدت غطس فى الحلة وبعدين طلعتها  و نشفتها علشان متخدش برد وحطيتها فى الشواية بتاعت الفرن لكن للاسف طلعت فار مسلوخ واول ما شافها جوزها العزيز اتخض وطبعا سألها أيه دي؟؟!!

هى : دي فراخ يا حياتى ...

هو بصلى وبص للفرخة وقال... هى تقريبا كانت فرخة بس شكلها اتحولت لكائن غريب

انتى عملتيها ازاى يا روحى -  جتك قصف روحك.. وحش رقبتك-

عادى انا سلقتها شوية وخليتها تبلبط فى الميه

وبعدين دخلتها شواية الفرن .... وغزتها بالسيخ المحمى فى صرصور ودنها

وكل دقيقة كنت بفتح الفرن الاقيها واقفة مكانها مش بتلف.... ولما زهقت قعدت الفها بايدى لحد ما بقت كده ... ايه مش حلوة؟؟

هو : بتلفى السيخ يا ماما ده بيلف لوحده..... وبعدين السيخ فيه ماساكتين بيتقفلوا عليها وتلف لوحدها

ايه اللى هببتيه ده؟؟ يا فلوسي وجيبى اللى اتخرب

انا : يا حبيبى وانا اقفل عليها ليه وهى كانت هتهرب ؟؟

يعني مش كفاية كان مقفول عليها القفص وهي عند الفرارجي كمان هنقفل عليها الفرن بعد موتها

هو : يا دماغى .. هتموتينى .. مش مهم الفرخة... فين الشوربة بقى ؟؟

انا : شوربة ..!ودى بتتعمل ازاى؟؟ انا معرفش

هو : يا خرابى الشوربة ..الميه اللى سلقتى فيها الفرخة ... الشوربة السخنة دى؟؟

انا : اه انت تقصد الميه اللى الفرخة خدت فيها غطس

اه بس انا رميتها... لقيتها مش حلوة

ودسمة خفت علي صحتنا لما نشربها فرميتها

هو انت كنت عايز منها حاجة؟؟

هو : صبرني يارب

استنوا رايحين فين , يــــتبع فى الحلقة التانية ....:)

ذكريات ومواقف أول ايام الجواز(الحلقة الثانية)

فى يوم تانى بقى صحى من النوم مفزوع ....

وانا عمالة اصرخ وبجرى عليه

انا : الحق ...الحق الغسالة ... بتزمر وهتقع وهتوقع البيت

هو : ايه فى ايه ؟؟ ايه الصوت ده ؟؟ رعبتينى ... وقلقتى منامى ..

انا : مش عارفة انا حطيت الهدوم علشان تتغسل ولقيت الغسالة

بتجرى من مكانها وبتزمر

هو : اقول عليكى ايه ؟؟ كل ده غسيل حاطاه فيها ؟؟

دى بتشيل خمسة كيلو ....مش 150 اخ يا نارى منك ...

اعمل فيكى ايه؟؟ فزعتينى

انا : هاتلى غسالة اكبر بتشيل كتير... لحسن دى اظاهر ان ايدها بتوجعها وبتصوت لما الغسيل بيتقل

شكلها غسالة صحتها على ادها

هو : ماحدش يحوشنى ...ما حدش يمسكنى هموتها .. طراخ

لقيته واقف ادام باب الدولاب و فى يوم تالت من ذات الايام صحيت من النوم على حين غفلة – حلوة على حين غفلة دى -

ومتنح ووشه اصفر ومبيتكلمش

انا : مالك انت لقيت عفريت فى الدولاب ولا ايه؟؟

مالك متسمر مكانك كده ليه؟؟

هو : ايه ده هدومى كلها بقت ملونة كده ليه كل

حتة ميت لون ؟؟

انا : ايه يا حبيبى مهدومك نضيفة وزى الفل

اهى وريحتها برفيوم واخر دلع

انا بس لقيتهم وسخين فخدتهم نقعتهم تلاتة ايام

....وحطيت عليهم كلور

هو : يا مصيبتى يا هدومى يا عشرة عمرى كله... كلور يا شحتفة قلبى

طيب وهدومى وقمصانى حبايبى البيض اللى مابقاش حيلتى غيرهم... هما فين؟؟

اوعى تقولى نقعتيهم في جاز ولا حطيتى عليهم شوية زفت ومازوت... ما انتى مهفوفة وتعمليها؟؟

انا : ليه وانت شايفنى عبيطة ولا هبلة؟؟

انا اصلى لقيتهم وسخين ووحشين ... وقعدت اغسلهم لحد لما تعبت

زهقت رحت حطيتهم مع الفوط في الغسالة وشغلتهم علي السخن

وطلع لونهم كده ... يالا أهو تغير

هو : يا خرابى يا هدومى اعمل ايه انا دلوقتى؟؟

اروح الشغل بالبرنس ؟؟

منك لله يا شيخة والله لخلى ليلتك بمبى زى لون الهدوم

انا : ايه يا حبيبى بمبى ايه وبتاع ايه ؟؟

الربيع لسه مجاش

هو : الحقونى يا هوو قبل ما ارتكب جناية واروح ابو زعبل.....:)

حنكمل سوا بقى بعد ما ينزل الشغل اوعو تروحو فى حتة .