كيف تطفيشين عريسا

طبعا مشكلة كبيرة بتقابلنا لما تلاقي واحد جاي يتقدم وانتي عايزة تطفشيه ومش عارفة, تعالوا نشوف ازاي نخلص من الورطة دي:

بنكون ف حالنا ومرتاحين وفجأة نسمع الخبر الصاعقة: جايلك عريس يابنتي يا دي المشكلة دانا مش عايزة اتجوز ياماما (على الاقل دلوقت) تعالى شوف الحق بنتك بتقول مش عاوزة اتجوز , هو كل مرة كدة بلاش دلع قابليه وبعدين ابقي قولي اللي انتي عايزاه

وهنا بيكون لا مفر انك تقابليه  ولو لقيتي انو مش مناسب وكلمة لا خايفة تقوليها ليحصل هجوم حاد مضاد من اهلك تعملي ايه؟ هنا بقى يجي دور خططنا البسيطة دي , بس يارب تنفع



اول حاجة ياست البنات:
جربي الاول تقولي لا بهدوء وتناقشي الاسباب مع اهلك ويا اما يقنعوكي يا تقنعيهم طيب و لا اقتنعتي و لا اقتنعوا و مصريّن تجربي الاول تعرفيه وعندهم امل, نتنقل بقى للخطوة التانية:

يوم مايجي مش لازم تلبسي اللي ع الحبل وتتشيكي لا خليكي عادية جدا والبسي اي حاجة وخلاص
بلوزة لونها سخيف, جيبة موضة قديمة جدا , طرحة لونها مش مناسب للطقم, الوان متنافرة, اي حاجة من الحاجات دي و لو كنتي فى اول مقابلة عرفتي ايه الالوان اللي بيكرهها البسيها ولو سألك ليه قوليله بحب اللون دة جدا وكل هدومي كدة عاجبك؟؟

بعد كدة بقى وانتو قاعدين طنشيه خالص ووجهي كلامك لأي حد موجود في القعدة دي الا هو,كلمي مامته مامتك اخوكي باباكي اي حد الا سيادته, ولو وجهلك اي كلمة ردي بالقطارة ويادوب كلمتين وبس

لو حب يفتح معاكي اي مجال للكلام صديه, وقوليله ردود تغيظ بس بذوق وادب, لو كان أهلاوي قولي انا بقى بشجع الزمالك, لو مش بيحب حاجة قولي انك بتحبيها جدا,مثلا مش بيحب الكوسة, قولي طب ليه كدة دانا بحب اعملها كل ماجي اطبخ , لو مش عاوزك تشتغلي قولي لا هشتغل وبحب الشغل جدا, حتى لو ناوية تسيبي الشغل بعد كدة المهم انك تطهقيه عشان يطفش

- لما تيجي تقدمي واجب الضيافة: هنا بقى حاجات كتير ممكن تحصل مثلا لو شاي او اي حاجة سخنة بلاش تدلقيها عليه حرام بلاش تجيبي لنفسك مصيبة, انما لو حاجة باردة مفيش مانع مش هتضره غير بس هدومه تتبهدل, المهم ماتوقعيش حاجة على الفرش بتاعكم ومامتك ذنبها ايه؟
لو هتقدمي عصير مثلا بلاش تقدميه ساقع قدميه سخن ولو شاي قدميه بارد لو بيحب القهوة او الشاي سادة قدميه سكر زيادة والعكس صحيح

اما لو كانت بقى المقابلة في شغلك واتعمل فيكي مقلب وخلوه يجيلك هناك تعملي ايه بقى ؟
الخطة بسيطة برضه خليه يستنى برة مكتبك كتير بحجة ان عندك شغل, ومتخليش السكرتيرة او الساعي يدخله الطعيه برة على الاقل نص ساعة او ساعة طيب نفرض مازهقش برضه؟ , يدخل ماشي, بس اول مايدخل اعملي نفسك مشغولة امسكي التليفون وكلمي اي واحدة من صاحباتك تسأليها عن اي حاجة تخص الشغل واتكلمي كدة على الاقل عشر دقايق بعد كدة ياستي لو فضل مستني برضه اتكلمي بالقطارة برضه, واعملي نفسك خارجة برة تقولي للسكرتيرة تجيبله حاجة ساقعة واقعدي برة شوية
لو ف عز الشتا قدميله عصير متلج, ولو ف عز الحر قدمي شاي او قهوة سادة او كوب كاكاو سخن مولع و ماتنطقيش خالص غير بس رد على اي حاجة بيقولها ويكون كلامك زي ما قلنا بالقطارة, ويادوب كلمتين وبس , لو بعد دا كله يامسكينة مفيش فايدة ومازال متمسك بيكي ومعرفتيش تطفشيه, يبقى شاريكي وعليكي انك تفكري تاني, يمكن, والبقاء لله بقى في حياة العزوبية بتاعتك, واتجوزي المحروس وامرك لله

نيجي بقى لشوية نصايح كده تنفع وقت اللزوم فحتى لا تفاجئي عزيزتي انك معروضة على عريس ليبدي رأيه فيكي فهناك عدة مؤشرات ودلائل التي قد توحي لك ان هناك عريس في الطريق فخذي حذرك ولا تسمحي لهم بمفاجأتك:

انذار: العريس قادم

مثلا ان تتصل بك خالتك اللي عمرها ماكلمتكو الا في المناسبات الوطنية لتسألك عن احوالك وتذكرك بأنك كبرتي وكأنها اكتشفت سر من اسرار الكون, ثم تسألك هل ارتبطتي ام لا, هذه اشارة واضحة لاتتجاهليها.
او ان يطلب منك عمك ان تزوريه لانك وحشتيه جدا , ونفسه يشوفك اوي, انتي التي تناولتي الغداء لديه من يومين فقط, اذن العريس يلوح في الافق

ومن الجائز ان تكوني في مشوار مع صديقاتك لتفاجئي بمكالمة من البيت على المحمول لتجدي اباك يسألك بكل براءة انتي فين, مع انه لسة موصلك لصديقاتك من نص ساعة بس, ثم يطلب منك سرعة العودة للمنزل عشان في ضيوف, متهيألي واضحة اوي دي.

أو قد يمنعك والدك في يوم من الخروج بحجة ان عمو فلان..فاكراه.. جاي يباركلنا على الشقة الجديدة, ولازم تكوني موجودة, دا باعتبار انك المرشدة السياحية لشقتكو, عموما كتير خيره الراجل بصراحة, لولا انه اتأخر قليلا, فالشقة (الجديدة)بقالها 15سنة, ولكن يبدو انه صبر حتى يضمن استقراركم في الشقة, وحتى كبر ابنه وبدأ في البحث عن عروسة

ولا يجب ان ننسى دور الام مع ابنتها والذي يكون غالبا في غاية الوضوح ( يابنتي انتي بقيتي عروسة).. او مثلا تيجي داخلة بيتكو تلاقي والدتك قاعدة مع واحدة عمرك ما شفتيها وتقولك تعالي سلمي على طنط عنايات, دي زميلتي من ايام الكلية , قابلتها صدفة في وسط البلد, يامحاسن الصدف, وسط البلد اللي الناس بتتوه فيه من بعض اصبح الناس تتقابل فيها صدفة, وتنظر لك طنط عنايات بإعجاب شديد وتهتف: بسم الله ماشاء الله تعالي ياعروسة, عروسة!!!! هنا قد يبدأ الشك, ولكنه يتاكد بعد يومين حين تتقمص والدتك دور الشيخة نادية وتقولك شفتلك حلم امبارح انما يشرح القلب, وتشرحلك بالتفاصيل الفرح, والفستان والزفة واوصاف العريس الذي هو مرعي ابن طنط عنايات!!!

كل ماتقدم ينذر بالخطر المحيط بك... فكيف تتصرفين؟؟؟

كيف ترفضين عريسا

خطة أ:الحجج التي تعينك على رفض هذا العريس :

- فأول تلك الحجج هي انك تريدين اكمال تعليمك .. أما لو كنت قد تخرجت بالفعل فتقولين لهم: لا لسة بدري.. هناك الماجستير والزمالة والدكتوراة, وجوائز الدولة التقديرية والتشجيعية والطحينية أيضا , ثم الحلم الاكبر بالحصول على جائزة نوبل في اي حاجة... ويديكي طولة العمر.

- هناك أيضا مقولة انك مش بتفكري في الموضوع دا دلوقتي... عشان في مواضيع اهم شاغلة تفكيرك مثل قضية اللاجئين وحرب الشيشان, وأزمة البنجر في الجابون.. وحين تحل تلك القضايا وينتهى ثقب الاوزون ستفكرين فعليا في الزواج.

- قد تتحججين ايضا بارتباطك الشديد بوالدتك, وأنك لا تستطيعين مفارقتها, وهذه ستكون هدية العمر لأبيك والذي سيقترح - بكل خبث - أن تاخذيها معك, وتكون هذه الطامة الكبرى للعريس الذي سيفر بمجرد سماع الاقتراح.

أما اذا لم يقتنع اهلك بكل تلك الحجج واصروا ان تقابلي الموكوس , فهناك عشرات العيوب التي يمكنك اختلاقها في اي شخص.

خطة ب: عيوب متتقدرش بتمن

- فإن كان بشنب فهو شكله وحش بالشنب, ولو كان من غير شنب فأنت لا تقبلين رجلا بدون شنب.
- لو كان تخين فهو بكرش وغير مناسب, ولو كان رفيع فهو هيكل عظمي وغير مناسب ايضا.
- لو كان يزوركم كتير فهو لزقة, ولو قلل من زياراته فهو لا يحبك.
- لو بيتكلم كتير يبقى رغاي ولو كلامه قليل يبقى طوبة.
- لو واثق في نفسه يبقى مغرور, ولو مش واثق تبقى شخصيته ضعيفة.
- لو سريع البديهة فهو متهور, ولو متأني يبقى تنح.
- لو بيفكر يحسن وضعه في الشغل يبقى طماع ولو مبيفكرش فهو فقري.
- لو استشارك في كل الامور فهو متردد وبريالة, ولو اتصرف من نفسه فهو ديكتاتور.
- لو صرف عليكي كتير يبقى مسرف, ولو صرف قليل يبقى بخيل.
- لو بيحب امه يبقى دلوعة ماما, ولو مش بيحبها فهو جاحد.
- لو بيغير عليكي فهو متخلف او مش واثق فيكي, ولو مش بيغير يبقى مقطف.

خطة ج:طريقة كلامه عن والديه

فهي تدل على مستواه الثقافي, وهي ايضا تلكيكة جديدة كي ترفضيه:

- مثلا ان كان يتكلم عنهما بصيغة: ابويا - امي فهو فظ غليظ لن يحسن التعامل مع فتاة رقيقة مثلك.
- أما ان كان يتكلم بصيغة بابي - مامي- دادي, فهو دلوعة ومايص ومايع ولا يصلح الا لرقص الباليه.
- أما ان كانت صيغته هي والدي- والدتي, فهو رسمي جدا كأنه يحدث مديره في الشغل.. ماينفعش.
- لم يبق الا صيغة بابا- ماما وهنا يصبح عاديا جدا وليس به شيء مميز ويكون مصيره الرفض ايضا.

خطة د: جدك كان قائد طابية ..لأ تبقى موش من مستوايا

يجب ان يستيقظ الغل الطبقي في اعماقك, , وعليكي ان تكني كل الحقد والكراهية لكل طوائف الشعب... وان تسترجعي ميولك الاقطاعية -حتى لو كانت امك بائعة فجل - وتكون طريقة كلامك بكل الاطة على النحو التالي:

- لأ ماتجوزش فلاح: طينة وزرع ومش بدوده.
- دا مش فلاح دا صعيدي
- ومش ممكن اتجوز صعيدي.. يطلع عليه تار ولا يطلعوا عليه نكتة.
- طيب في واحد سواحلي
- لا لا لا لا الا السواحلية رمل وسمك ورطوبة.
- طيب العريس بتاع القاهرة
- أنا اتجوز قاهري, تلوث وضوضاء وعشوائية.. مش ممكن.
- طيب بلاش القاهرة في واحد بدوي.
- بدوي ايه.. مستحيل... قال بدوي قال.
أما أي جنسية خارج حدود الوطن فهي مرفوضة تماما, مش ناقصة بهدلة, وعليكي انتظار كائن فضائي من اورانوس للزواج.

خطة هـ: التوافق.

. يجب ان تكونا متوافقين تماما في الافكار والمعتقدات والهوايات, فلو انه لا يحب نفس الموسيقى والطربين بالضبط دون اي اختلاف كأنه نسخة جينية منك فلترفضيه على الفور فأنتما غير متوافقين.

اما لو كان يحب نفس الموسيقى ونفس المطربين دون اي اختلاف كأنه نسخة جينية منك فلترفضيه ايضا فلا حاجة ان تتزوجي نسخة منك.. انت موجودة.
ويسري هذا على الكتاب والممثلين وابطال صيد السردين.. يجب ان يحب ماتحبين او لا يحب مش فارقة.. هايترفض هايترفض.

خطة و: برجك ايه؟؟؟؟!!

يجب ان تراعي توافق الابراج بينك وبين عريس الوكسة, فمثلا لو ان برجك مائي وبرجه ترابي فهذا يبشر بحياة مطينة بطين,  اما لو كان برجك مائي وبرجه هوائي فيدل هذا على حياة مليئة بالعواصف والاعاصير ودوار البحر,  أما زواج البرج الهوائي بالترابي فينذر بالبعثرة وتفرق الشمل اما بقى لو كان برجه ناري فارفضيه ايا كان برجك, فاحتمالات انه يولع فيكي كبيرة جدا وكما ترين يافتاتي فمهما كان فإن عريسك مرفوض مرفوض مرفووووض يا ولدى

النصيحة الذهبية:

اطلبي .. اطلبي..اطلبي
انتي العروسة فاطلبي ماتشائين.. اطلبي لبن العصفور وبيض الديك وقارورة من دمع التماسيح, واذا لم يلب طلباتك استمارة 6 علطول.. اكيد عارفة الاعلان الانتهازي بتاع " انا عايزة دي ودي ودي "
خليكي محدثة نعمة واخربي بيته, مش عايز يتجوز يدفع..